ގެއްލުނު ޔާމީން ވަނީ ބްރިޖުން މޫދަށް ފުންމާލާފައި ކަމަށް ފުލުހުން ބުނެފިއެވެ.

ފުލުހުން މައުލޫމާތު ދިން ގޮތުން ޙަސަން ޔާމީން ހޯދުމަށް، ތަހުގީގުގެ ތެރެއިން ގިނަ އަދަދެއްގެ ސީސީޓީވީ ފުޓޭޖް ދިރާސާކޮށްފައިވާކަމަށެވެ. އެގޮތުން، 2025 ޖުލައި 13 ވަނަ ދުވަހުގެ ފަތިހު 03:24 ހާއިރު ޙަސަން ޔާމީން ސިނަމާލެ ބްރިޖުން މޫދަށް ފުންމާލާ މަންޒަރު ސީސީޓީވީ ފުޓޭޖުން ފެނިފައިވާ ކަމަށް ފުލުހުން ބުންޏެވެ.

މި މައުލޫމާތު އާއިލާއާ ހިއްސާކޮށް، އާއިލާއާ ވަރަށް ގާތުން ތަހުގީގު ޓީމުން މަސައްކަތް ކުރަމުން ގެންދާކަމަށް ފުލުހުން ބުނެފައިވެއެވެ.

މި މައްސަލައިގެ ތަހުގީގަށް ލިބުނު މި މައުލޫމާތާ ގުޅިގެން، މެރިން ޕޮލިހާއި މޯލްޑިވްސް ނޭޝަނަލް ޑިފެންސް ފޯސްގެ ކޯސްތްގާޑު ގުޅިގެން، ޙަސަން ޔާމީން ޙޯދުމުގެ މަސައްކަތް ދަނީ ކުރަމުންނެވެ.

ގ. ގާރނެޓްގައި ދިރިއުޅޭ ޙަސަން ޔާމީން (30 އަހަރު) ޖުލައި 11 ވަނަ ދުވަހުގެ ރޭ 9:25 އެހައިކަށްހާއިރު ގެއިން ނުކުމެގެން ދިޔަފަހުން އާއިލާއަށް އެއްވެސް ޚަބަރެއް ނުވެ ވަނީ ގެއްލިފައެވެ. މި މައްސަލަ ފުލުހުންނަށް ރިފޯޓުކޮށްފައިވަނީ 2025 ޖުލައި 14 ވަނަ ދުވަހު ޙަސަން ޔާމީންގެ އާއިލާގެ ފަރާތުންނެވެ.