ރާއްޖޭގައި ބާސްކެޓްބޯޅަ ކުރިއަރުވައި، ވަސީލަތްތައް ގާއިމުކުރުމަށްޓަކައި ފަސް އަހަރު ދުވަހުގެ ސްޓްރެޓެޖިކް ޕާޓްނަޝިޕް އެއްބަސްވުމެއްގައި ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން މިއަދު ސޮއިކޮށްފިއެވެ.

މި އެއްބަސްވުމުގައި ބީއެމްއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ޝަރީފެވެ. އަދި އެމްބީއޭގެ ފަރާތުން ސޮއިކުރެއްވީ އެސޯސިއޭޝަންގެ ރައީސް އަޙްމަދު އާދަމް (އެޑަމް) އެވެ.

Ad by Hajj Corporation

މި އެއްބަސްވުމުގެ ދަށުން ބީއެމްއެލްއިން އިންޑޯ ބާސްކެޓްބޯޅަ އެރީނާއެއް ތަރައްގީކޮށްދިނުމަށް ހަމަޖެހިފައިވާއިރު، މި އެރީނާއަކީ ބާސްކެޓްބޯޅަ ގައުމީ ޓީމާއި ކުޅުންތެރިންގެ ޕްރެކްޓިސްއަށް ޚާއްސަ ކުރެވިފައިވާ ތަނަކަށް ވެގެންދާނެއެވެ. އަދި ރާއްޖޭގެ އެންމެ ފާހަގަކޮށްލެވޭ ދެ ބާސްކެޓްބޯޅަ މުބާރާތް ކަމަށްވާ ނެޝަނަލް ބާސްކެޓްބޯޅަ ލީގާއި ނެޝަނަލް 3 އޮން 3 ލީގު ކުޅުމަށްވެސް މި އެރީނާ ބޭނުންކުރެވޭނެއެވެ.

"މިއާއެކު ކުޅުންތެރިން ތަރައްގީ ކުރުމަށް މަގުފަހިކޮށްދެވި މުޅި ރާއްޖޭގައި މި ކުޅިވަރު އިތުރަށް ކުރިއެރުވުމަށް މަގުފަހިވެގެންދާނެ،" ބީއެމްއެލްއިން މިކަމާ ގުޅޭގޮތުން ބުނެފައިވެއެވެ.

މީގެއިތުރުން، ރާއްޖޭގެ މައި ދެ ޓޯނަމަންޓް ކުރިޔަށް ގެންދިއުމަށް އެހީތެރިވެދިނުމާއި، ވާދަވެރި ޕްލެޓްފޯމުތައް އުފައްދައި، ރާއްޖޭގެ އެތުލީޓުން ތަމްރީނުކޮށްދިނުމަށްވެސް ބީއެމްއެލްއިން އެހީތެރިވެދޭގޮތަށް ދެފަރާތުން ވަނީ އެއްބަސްވެފައެވެ.

މި އެއްބަސްވުމަކީ ރާއްޖޭގެ ބާސްކެޓްބޯޅައަށް އައު ހަރުފަތަކަށް އެޅޭ ފިޔަވަޅެއް ކަމަށް ބެލެވެއެވެ.