ލަންކާ މީހުންނަށް ރާއްޖެއިން 90 ދުވަހުގެ އޮން އެރައިވަލް ވިސާ ދޭން ފަށައިފި
31 ޖުލައި 2025 - 04:49
ރާއްޖެއަށް އަންނަ ސްރީލަންކާ މީހުންނަށް 90 ދުވަހުގެ އޮން އެރައިވަލް ވިސާ ދޭން ފަށައިފިއެވެ.
މިއީ ސްރީލަންކާގެ ރައީސް އަނޫރާ ކުމާރަ ޑިސެނަޔަކަ ރާއްޖެއަށް ކުރެއްވި ފުރަމާނަ ދަތުރުފުޅުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އެކު ކުރެއްވި މަޝްވަރާތަކަށް ފަހު ނިންމި ނިންމުމެއްކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން ބުނެފައިވާ ގޮތުގައި، މި އަހަރުގެ ޖެނުއަރީ މަހުން ފެށިގެން ސްރީލަންކާއަށް ދަތުރުކުރާ ދިވެހިންނަށް ވެސް 90 ދުވަހުގެ އޮން އެރައިވަލް ވިސާ ދެމުން އަންނަ ކަމަށާއި، މި ނިންމުންތަކުން ދައްކުވައިދެނީ ދެ ގައުމުގެ ގާތް ގުޅުންކަން އެ ފަރާތުން ވަނީ ފާހަގަކޮށްފައެވެ.
މީގެ އިތުރުން، ސްރީލަންކާގައި ވަޒީފާ އަދާކުރާ ނުވަތަ މަތީ ތައުލީމް ހާސިލްކުރާ ދިވެހިންގެ އަނބިން/ފިރިންނަށް އެއް އަހަރު ދުވަހުގެ ވިސާ ލިބޭނެ އިންތިޒާމު ވެސް ވަނީ ހަމަޖައްސާފައެވެ.
ސްރީލަންކާއިން ވަނީ އަންނަ މަހުން ފެށިގެން ދިވެހިންނަށް އެއް އަހަރު ދުވަހުގެ ވިސާ ދޭން ފަށާނެ ކަމަށް ވެސް އިޢުލާނުކޮށްފައެވެ. މި ބަދަލުތަކާ އެކު ދެ ގައުމުގެ ރައްޔިތުންނަށް ދަތުރުފަތުރު ކުރުމަށް އިތުރު ފަސޭހަތަކެއް ލިބިގެންދާނެއެވެ.
