ބ. އަތޮޅުގެ ރައްޔިތުންނަށް ޕާސްޕޯޓުގެ ޚިދުމަތް އިތުރަށް ގާތުން އަދި ލުއިފަސޭހަކޮށް ފޯރުކޮށްދިނުމަށްޓަކައި، އެ އަތޮޅު ދަރަވަންދޫގައި މިއަދު ރަސްމީކޮށް ޕާސްޕޯޓުގެ ޚިދުމަތް ފަށައިފިއެވެ.

މި ޚިދުމަތް ފެށުމާ ގުޅިގެން މޯލްޑިވްސް އިމިގްރޭޝަނުން ބުނީ، ބ. އަތޮޅުން ޕާސްޕޯޓު ނެގުމަށް ބޭނުންވާ ފަރާތްތަކަށް މިހާރު "އިމުގާ" ޕޯޓަލް މެދުވެރިކޮށް އޮންލައިންކޮށް ޕާސްޕޯޓަށް ހުށަހެޅޭނެ ކަމަށެވެ. އަދި ޕާސްޕޯޓާ ހަވާލުވުމަށް "ކަލެކްޝަން ޕޮއިންޓް" ގެ ގޮތުގައި ބ. އޭދަފުށީގެ އިތުރުން ދަރަވަންދޫ ވެސް މިހާރު ޚިޔާރުކުރެވޭނެ ކަމަށް އެ އިދާރާއިން މައުލޫމާތު ދެއެވެ.

Ad by Hajj Corporation

ޕާސްޕޯޓުގެ ޚިދުމަތް ރާއްޖޭގެ ހުރިހާ އަތޮޅުތަކަށް ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަރަށް ބޮޑު އިސްކަމެއް ދެއްވައިގެން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ދަށުން ބ. އަތޮޅު އިމިގްރޭޝަން އޮފީސް އޭދަފުށީގައި ރަސްމީކޮށް ހުޅުވާފައިވަނީ ނިމިދިޔަ އޯގަސްޓު މަހުގެ ތެރޭގައެވެ.

ދަރަވަންދޫގައި މި ޚިދުމަތް ރަސްމީކޮށް ފެށުމާއެކު، އެ ރަށުގެ ރައްޔިތުންނާއި ކައިރި ރަށްރަށުގެ ރައްޔިތުން ޕާސްޕޯޓު ހޯދުމަށް ކުރަންޖެހޭ ދަތުރުތައް މަދުވެ، ވަގުތާއި ޚަރަދު ސަލާމަތްވެގެންދާނެއެވެ. މިއީ އަތޮޅުތެރޭގެ ރަށްރަށަށް އިމިގްރޭޝަންގެ ޚިދުމަތްތައް ފުޅާކޮށް، ރައްޔިތުންނަށް އަވަސް ޚިދުމަތެއް ފޯރުކޮށްދިނުމަށް ކުރެވޭ މުހިންމު މަސައްކަތެކެވެ.