ކުޅަދާނަކަން ލިބިގެންވާ މިންވަރުން ޣައްޒާއަށް އެހީތެރިވުމަކީ އިންސާނީ ވާޖިބެއްކަމަށް އިލްމީކަންތައްތަކާއި ބެހޭ ވަޒީރު ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ވަޒީރު ވަނީ ޣައްޒާއަށް އިންސާނީ އެހީ ފޯރުކޮށްދޭ ޖަމިއްޔާތައް މެދުވެރިކޮށް ކާބޯތަކެތީގެ އެހީތެރިކަން ފޯރުކޮށްދިނުމަށް ގޮވާލައްވާފައެވެ.

ވަޒީރު ވިދާލުވީ އެންމެ ފުރާނައަކަށް ދިރުން ހޯދައި ދިނުމަކީ މުޅި އިންސާނިއްޔަތަށް ދިރުން ދިނުން ފަދަ ކަމެއްކަމަށެވެ.  އަދި ޣައްޒާގައި ހާލުގައި ޖެހިފައިވާ މުސްލިމް އަހުންނާއި އުހުތުންނަށް އެހީތެރިވުމަށް ރާއްޖޭގެ އެކި ފަރާތްތަކުންވެސް ކެނޑިނޭޅި ގިނަ މަސައްކަތްތަކެއް ކުރަމުންދާކަން ވަޒީރުފާހަގަކުރެއްވިއެވެ.

ވަޒީރު މިފަދައިން ވިދާޅުވެފައި މިވަނީ، ޣައްޒާގެ އެތައް ކުޑަކުދިންނަކާއި އެތައް ބަޔަކު ބަނޑުހައިހޫނުކަމުގައި މަރުވަމުންދާ ދަނޑިވަޅެއްގައެވެ. އިސްރާއީލުން ޣައްޒާއަށް އެހީ ވަނުމަށް ހުރަސްއަޅާފައިވާއިރު، ކާނާ ހޯދުމަށްދާ ޣައްޒާގެ ރައްޔިތުން އެހީދޭ މަރުކަޒުތަކުގައި ދަނީ ޝަހީދު ކުރަމުންނެވެ.

ޣައްޒާގެ ސިއްހަތާބެހޭ ވުޒާރާއިން ހާމަކުރި ތަފާސްހިސާބުތަކުން ދައްކާގޮތުގައި، ފާއިތުވި 24 ގަޑިއިރުގެ ތެރޭގައި 88 މީހުން ޝަހީދުވެފައިވާއިރު، 374 މީހުން ވަނީ ޣައްޒާގެ ހޮސްޕިޓަލްތަކުގައި ޒަހަމްތަކާއެކީ އެޑްމިޓްކޮށްފައެވެ.