ޓޮޓެންހަމް ހޮޓްސްޕަރގެ ކެޕްޓަން ސަން ހޫންގް-މިން ކުލަބު ދޫކޮށްލާނެ ކަމަށް އިއުލާނުކޮށްފިއެވެ. 2015 ވަނަ އަހަރު ބަޔަރ ލެވަކޫސަންއިން ޓޮޓެންހަމާ ގުޅުނު ސަން ވަނީ ކުލަބަށް 454 މެޗު ކުޅެ 173 ލަނޑު ޖަހާފައެވެ.

މިދިޔަ މޭ މަހު ޔޫރަޕާ ލީގު ފައިނަލްގައި މެންޗެސްޓަރ ޔުނައިޓެޑް ބަލިކޮށް 17 އަހަރުގެ ފަހުން ޓޮޓެންހަމަށް ފުރަތަމަ މަގާމު ހޯދައިދިނުމުގައި ސަން ވަނީ ކެޕްޓަންގެ ހައިސިއްޔަތުން އިސް ދައުރެއް އަދާކޮށްފައެވެ. 2026 ވަނަ އަހަރާ ހަމައަށް ކޮންޓްރެކްޓް އޮތް، 33 އަހަރުގެ ސަން އެމެރިކާގެ މޭޖަރ ލީގް ސޮކަރގެ ލޮސް އެންޖެލެސް އެފްސީއާ ގުޅޭނެ ކަމަށް ބެލެވެއެވެ.

Ad by Hajj Corporation

"މިއީ އަހަރެންގެ ކެރިއަރގައި އެންމެ އުނދަގޫ ނިންމުން،" އައު މެނޭޖަރ ތޯމަސް ފްރޭންކާއެކު ބޭއްވި ނޫސްވެރިންގެ ބައްދަލުވުމެއްގައި ސަން ބުންޏެވެ. "އިނގިރޭސި ބަހުން ވާހަކަ ވެސް ނުދެއްކޭ ކުޑަކުއްޖެއްގެ ގޮތުގައި އުތުރު ލަންޑަނަށް އައި އަހަރެން، މިހާރު މި ދަނީ ބޮޑު މީހެއްގެ ގޮތުގައި. މިއީ ވަރަށް ފަޚުރުވެރި ވަގުތެއް."

ޕްރީ ސީޒަން ތައްޔާރީތަކުގެ ތެރެއިން ޓޮޓެންހަމް މިހާރު ވަނީ ސޯލްގައެވެ. އާދިއްތަ ދުވަހު ނިއުކާސްލްއާ ކުޅޭ މެޗުގައި ސަން ކެޕްޓަންކަން ކުރާނެއެވެ. އޭނާގެ އަމިއްލަ ގައުމުގައި އެންމެ ފަހު މެޗު ކުޅުމުގެ ފުރުސަތު ލިބިދާނެއެވެ.

ޖޫން މަހު އޭންޖް ޕޮސްޓެކޯގްލޫގެ ބަދަލުގައި ޓޮޓެންހަމްގެ ހެޑް ކޯޗްގެ މަގާމާ ހަވާލުވި ތޯމަސް ފްރޭންކް ވަނީ ސަންއަކީ "ޓޮޓެންހަމްގެ ތާރީޚުގައި ފާހަގަކޮށްލެވޭ ކުޅުންތެރިއެއް" އަދި "ޕްރިމިއަރ ލީގުގައި ކުޅުނު އެންމެ މޮޅު ކުޅުންތެރިންގެ ތެރެއިން އެކެއް" ކަމަށް ބުނެފައެވެ. "ސޮނީގެ އެންމެ ފަހު މެޗު މިތާ އޭނާގެ ގައުމުގެ ސަޕޯޓަރުންގެ ކުރިމަތީގައި ކުޅެން ލިބުނީ ވަރަށް ރީތި ނިމުމެއް ލިބޭނެ" ކަމަށް ފްރޭންކް ބުންޏެވެ.