މާލެއިން ފުރައިގެން ތ. ވޭމަންޑޫއަށް ދަތުރުކުރަމުންދިޔަ މުދާ އުފުލާ ދޯންޏެއް ދިއްގިރި ކައިރިން ފަރަށް އަރައި ދިޔަވެ އަޑިއަށް ގޮއްސިއެވެ.

މެރިން ޕޮލިހުން މަޢުލޫމާތު ދިން ގޮތުގައި "އަލްމަޖްރާ" ނަމަކަށް ކިޔާ ދޯނި ފަރަށް އަރައި ދިޔަވެ އަޑިއަށްދާކަމުގެ މައުލޫމާތު އެ އިދާރާއަށް ލިބިފައިވަނީ މިއަދު ފަތިހު 5:34 ހާއިރުއެވެ.

 "ވ. އަތޮޅު ފުލުހުން އެ ސަރަހައްދަށް ދިޔައިރު، އެ ދޯނިން ދަތުރުކުރި 3 މީހުން ހާލުގައި ޖެހިފައި ފަރުމަތީގައި ތިއްބައި ފެނުނު، އެ މީހުން ފުލުހުންގެ ލޯންޗަށް ނަގައި މިހާރުވަނީ ފެލިދޫއަށް ގެންގޮސްފައި. 3 މީހުންގެ ހާލު ވެސް ރަނގަޅު. އެއީ ދިވެއްސަކާއި ބަންގްލަދޭޝް ދެ މީހުން،" މެރިން ޕޮލިހުން މަޢުލޫމާތު ދެއެވެ.

ދޯނި އަޑިއަށް ދިޔައިރު، އެ ދޯނީގައި ގިނަ އަދަދެއްގެ ޕީވީސީ ފިލާ އަދި އެބާވަތުގެ ގިނަ ސާމާނު ހުރިކަމަށް ދޯނީގައި ދަތުރުކުރި މީހުން މަޢުލޫމާތު ދީފައިވާ ކަމަށް ފުލުހުން ވަނީ ބުނެފައެވެ. މި ތަކެތި އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް ފުލުހުން ވަނީ އިލްތިމާސްކޮށްފައެވެ.