މިއަދު ހެނދުނުގެ ވަގުތެއްގައި ޓިކްޓޮކްއަށް އޮޅިގެން ލައިވްވެވި، މަންމައަކު ތުއްތު ކުއްޖަކަށް އަނިޔާކޮށް، އެ ކުއްޖާއަށް ހުތުރު ބަހުން އެއްޗެހިކިޔާ އަޑު އިވިގެން ދިޔަ މައްސަލަ އެއް ފެންމަތިވެއްޖެއެވެ.

މިކަން ހިނގާ ދިޔައީ މިއަދު ހެނދުނު ގެ ވަގުތެއްގައި ޓިކްޓޮކް ގްރޫޕް ލައިވްއެއްގެ ތެރޭގައެވެ. އެވަގުތު އެ ލައިވް ގައި ތިބި އެހެން މީހުން ވަނީ އަނިޔާނުކުރުމަށް ތަކުރާރުކޮށް އެ އަންހެންމީހާ ގާތު ބުނެފައެވެ.

Ad by Hajj Corporation

ނަމަވެސް ކުޑަ އިރުކޮޅެއް ވަންދެން އިނުމަށް ފަހު އެ އަންހެން މީހާ ވަނީ އެ ލައިވް އެންޑް ކޮށްލާފައެވެ. ބެލެވޭ ގޮތުގައި އޭނާ އަށް ލައިވް ވެވިފައިވަނީ އޮޅިގެންނެވެ.

40 ސިކުންތުގެ އެ ލައިވްގެ އަޑުކޮޅުގައި ކުއްޖާއަށް އަނިޔާކުރާ އަޑާއި، ހުތުރު އެއްޗެހިކިޔާ އަޑު އިވިގެން ދެއެވެ.އަދި ގިނައިރު ރޮއިފާ ވާތީ ކުއްޖާގެ އަޑު ރަނގަޅަސް ބޭރުނުވާކަނަް ވެސް ފާހަގަކުރެވެއެވެ.

ކުއްޖާގެ އަޑުން ބެލެވޭ ގޮތުގައި އެ ކުއްޖާ އަކީ 3 ނުވަތަ 5 މަހުގެ ކުއްޖެކެވެ. މި އަންހެން މީހާ އަކީ ކާކު ކަމެއް އަދި އެނގިފައެއް ނުވެއެވެ.

ފުލުހުންގެ މިޑިއާ އޮފިސަރަކު މެންދުރު ޓިީވީއަށް މައުލޫމާތު ދިން ގޮތުގައި މިކަމާ ބެހޭ މައުލޫމާތެއް ނުވަތަ މައްސަލައެއް އަދި ފުލުހުންނަށް ހުށަހަޅާފައެއް ނުވެއެވެ.

މި ފަހަކަށް އައިސް މިފަދަ އެތަށް މައްސަލަތަކެއް އަންނަނީ ޓިކްޓޮކް ލައިވް ތަކުގައި ފެންމަތިވަމުންކަން ފާހަގަ ކޮށްލެވެއެވެ.

ކުޑަކުދިންގެ ރައްކާތެރިކަން ކަށަވަރުކުރުމަށްޓަކައި،މިފަދަ ކަންކަން ކުރާ މީހުންގެ މައުލޫމާތު ކަމާ ގުޅޭ އެންމެހާ ފަރާތްތަކާ ހިއްސާކުރުމަކީ މުހިއްމުކަމެކެވެ.