ބާރަ ވަނަ ނޫސްވެރިކަމުގެ އިނާމުގެ ފަނޑިޔާރުންގެ ޕޫލަށް ނަން ހުށަހެޅުމުގެ ފުރުޞަތު މޯލްޑިވްސް މީޑިއާ ކައުންސިލުން ހުޅުވާލައިފިއެވެ.

މި ޕޫލަކީ މޯލްޑިވްސް މީޑިއާ ކައުންސިލުން ދޭ ނޫސްވެރިކަމުގެ އިނާމުގެ ހުށަހެޅުންތައް ވަޒަންކުރުމުގެ މަސައްކަތްތައް ކުރާ ފަނޑިޔާރުންގެ ޕޫލެވެ.

މި ޕޫލަށް ނަން ހުށަހެޅުމަށް ޝަރުތު ހަމަވާ ފަރާތްތަކަކީ، މީޑިއާ، ނުވަތަ ޖާނަލިޒަމް، ނުވަތަ ސޯޝަލް ސައިންސްގެ ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް 4 ގެ ސަނަދެއް ހާސިލްކޮށްފައިވާ ފަރާތްތަކެވެ. މީގެއިތުރުން، ސަރުކާރުގައި، ނުވަތަ ޕަބްލިކް ނުވަތަ ޕްރައިވެޓް ސެކްޓާގައި، ނުވަތަ ޤައުމީ ނުވަތަ ބައިނަލްއަގުވާމީ ޖަމްޢިއްޔާ ނުވަތަ ޖަމާޢަތެއްގައި މަދުވެގެން 3 އަހަރުދުވަހު މަސައްކަތްކޮށްފައިވާންޖެހޭނެ ކަމަށް އެމް.އެމް.ސީން ވިދާޅުވެއެވެ. އަދި، ފަނޑިޔާރުކަމުގެ މަގާމަށް ކަނޑައަޅާފައިވާ މަގާމުގެ މަސައްކަތާގުޅޭ ތަޖުރިބާ ލިބިފައިވުމަކީ ވެސް މުހިންމު ޝަރުތެކެވެ.

Ad by Hajj Corporation

މިކަމަށް އެދި ހުށައެޅުމުގެ އެންމެ ފަހު ތާރީހަކީ މި މަހުގެ 12 ވަނަ ދުވަހުގެ 13:00 ގެ ކުރިންނެވެ. ޝަރުތު ހަމަވާ ފަރާތްތަކުން އެމް.އެމް.ސީގެ ރަސްމީ ވެބްސައިޓުން ފޯމު ޑައުންލޯޑުކޮށް، ހުށައެޅުމަށް ވަނީ އިލްތިމާސްކުރައްވާފައެވެ.

މި އިނާމު ދިނުމުގެ މައިގަނޑު މަގުސަދުގެ ތެރޭގައި ދިވެހި ނޫސްވެރިންނަށް ހިތްވަރުދިނުމާއި، ދިވެހި ނޫސްވެރިންގެ މަސައްކަތް ފާހަގަކުރުމާއި، ނޫސްވެރިކަމުގެ ފަންނުގައި ނޫސްވެރިކަމުގެ އަހުލާގީ މިންގަނޑު ހިފަހައްޓައި، ފެންވަރު ރަނގަޅު އުފެއްދުންތައް އުފެއްދުމަށް ބާރު އެޅުން ހިމެނެއެވެ.