ގައިދީންގެ ގޮތުގައި ޙުކުމް ތަންފީޒުކުރާ މީހުންގެ ތެރެއިން މަސައްކަތްކުރާ މީހުންނަށް ދޭ އެލަވަންސް ބޮޑުކޮށްފިއެވެ.

މަސައްކަތް ކުރުމުން ގައިދީންނަށް ދެމުންދިޔަ އެލަވަންސް ބޮޑުކޮށްފައި މިވަނީ އެލަވަންސްތައް މުރާޖާކުރުމަށްފަހު ކަމަށް ކަރެކްޝަނަލް ސަރވިސް އިން ވަނީ ވިދާޅުވެފައެވެ.

ގައިދީން ކުރާ މަސައްކަތަށް މިހާރު ދެމުންދަނީ މީގެ 20 އަހަރު ކުރިން ފެށިގެން، ކަނޑައާޅާފައިވާ އެލަވަންސްތަކެކެވެ. އެކި ގްރޭޑް ތަކަށް ބަހާލައިގެން ގައިދީންކުރާ މަސައްކަތަށް އެންމެ ދަށް މިންވަރެއްގެ ގޮތުގައި މިހާރު ދުވާލެއްގެ މައްޗަށް 50 ރުފިޔާވަނީ ކަނޑައަޅާފައެވެ. އަދި އެންމެ މަތީ އަގަކީ ދުވާލަކަށް 150 ރުފިޔާކަން ކަނޑައަޅައި އެގޮތަށް ވަނީ ހަމަޖައްސާފައެވެ.

Ad by Hajj Corporation

ޤައިދީން ކުރާ މަސައްކަތްތަކަށް މީގެކުރިން ދެމުންދިޔައީ ދުވާލަކަށް 30 ރުފިޔާގެ އުސޫލުންނެވެ. އަދި ބައެއް ޚާއްސަ މަޝްރޫޢުތަކާއި ގުޅިގެން ކުރާ މަސައްކަތްތަކަށް އިތުރު އެލަވަންސެއް އޭރުވެސް ދެވޭކަމަށް ކަރެކްޝަނަލް ސަރވިސްއިން ވިދާޅުވެއެވެ. އަދި މިބަދަލަށް އަމަލުކުރަން ފަށާފައިވަނީ ޖުލައި މަހުގެ 16 އިން ފެށިގެންނެވެ.

ގައިދީން އުފައްދާ އެކި ހުނަރުވެރި އުފެއްދުންތައް ދައްކާލުމަށް އެކި ދުވަސްވަރު އެކި ކަހަލަ އެގްޒިބިޝަންތައް އަންނަނީ ބާއްވަމުންނެވެ. އޭގެ ތެރޭގައި ޖަލުގައި އުފައްދާ އެކި ބާވަތުގެ ދަނޑުވެރިކަމުގެ އުފެއްދުންތަކާއި ގައިދީންގެ އަތްތެރި މަސައްކަތްތައް ދައްކާލުމަށް އެގްޒިބިޝަންތައްވަނީ މީގެކުރިންވެސް ބާއްވާފައެވެ.