ކުރިއަށް އޮތް 24 ގަޑިއިރު ވެސް ވައި ގަދަވެ، ކަނޑުތައް ގަދަވާނެ ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް)އިން ލަފާކޮށްފިއެވެ.

އެ އިދާރާއިން ލަފާކުރާގޮތުގައި މޫސުން އަލިވާނީ މާދަމާއިން ފެށިގެންނެވެ.

Ad by Hajj Corporation

މޫސުމާ ބެހޭ ޤައުމީ އިދާރާއިން ވަނީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 40 މޭލަށް ވައި ގަދަވެ ކަނޑުތައް ގަދަވާނެ ކަމަށް ލަފާކޮށް ހއ. އަތޮޅުން ފެށިގެން މ. އަތޮޅަށް ހުދު ސަމާލު ނެރެފައެވެ.

ވޭތުވެދިޔަ 24 ގަޑިއިރުގެ ތެރޭގައި ވިލާގަނޑުގައި އެންމެ ވައި ގަދަވެފައިވަނީ ހުޅުލެއަށެވެ. އެގޮތުން އެރަށަށް 43 މޭލުގެ ބާރުމިނުގައި ވައި ޖެހިފައިވެއެވެ. އަދި އާންމު ވައި އެންމެ ގަދަވެފައިވަނީ ހދ. ހަނިމާދޫއާއި މަކުނުދޫއަށް ކަމަށާއި، މި ދެރަށަށް 22 މޭލުގެ ބާރުމިނުގައި ވައި ޖެހިފައިވާ ކަމަށް އިދާރާގެ ރެކޯޑުތަކުން ދައްކައެވެ.

މޫސުމާބެހޭ ޤައުމީ އިދާރާއިން ވިދާޅުވީ ކުރިއަށް އޮތް 24 ގަޑިއިރު އުތުރާއި މެދުރާއްޖެތެރޭ ކަނޑުތައް ގަދަވެފައި ވިލާގަނޑުގައި އިތުރަށް ގަދަވާނެ ކަމަށްށެވެ. އަދި ދެކުނުގެ އަތޮޅުތަކުގެ ކަނޑުތައް އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށް އެއިދާރާއިން ވިދާޅުވިއެވެ.

ވައިގަދަވެ، އުތުރާއި މެދުރާއްޖެތެރޭގެ އަތޮޅުތަކަށް ކަނޑުތައް ގަދަވާނެތީ ކަނޑު ދަތުރުފަތުރުކުރާ ފަރާތްތަކުން ސަމާލުވުމަށް މޫސުމާ ބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.