ނުކުޅެދުންތެރިކަން ހުންނަ ފަރާތްތަކަށް ޝާމިލްކުރަނިވި މާހައުލެއްގައި ތަމްރީން އަދި ހުނަރު ދަސްކޮށްދިނުމަށް ތަރައްގީކުރާ "އެމްޕަވަރމަންޓް ހަބް"ގެ މަސައްކަތް މި އަހަރު ޑިސެމްބަރު މަހުގެ ކުރިން ނިންމާލެވޭނެ ކަމަށް އިޖްތިމާއީ އަދި އާއިލީ ތަރައްގީއާ ބެހޭ ވުޒާރާގެ ސްޓޭޓް މިނިސްޓަރ އަހްމަދު އާތިފް ވިދާޅުވެއްޖެއެވެ.

އެމްޕަވަރމަންޓް ހަބް ތަރައްގީކުރުމަށް ކުރަމުންދާ މަސައްކަތްތަކާއި ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްވަމުން، އާތިފް ވިދާޅުވީ ނުކުޅެދުންތެރިކަން ހުންނަ ފަރާތްތަކަށް އަމާޒުކޮށްގެން އެ ވުޒާރާއިން ކުރިއަށްގެންދިޔަ ހާލަތު ދެނެގަތުމުގެ އެސެސްމެންޓް ނުވަތަ ފަންގްޝަނަލް އެސެސްމެންޓުންވެސް ސްކޫލް ނިންމުމަށްފަހުވެސް ނުކުޅެދުންތެރިކަން ހުންނަ ކުދިންނަށް އިތުރު ހުނަރުތައް ދަސްކޮށްދިނުމުގެ މުހިންމުކަން ފާހަގަކުރެވިފައިވާކަމަށެވެ.

Ad by Hajj Corporation

40-18 އަހަރާއި ދެމެދުގެ އުމުރުފުރާގެ މީހުންނަށް ހިދުމަތް ދިނުމަށް އަމާޒުކޮށްގެން ތަރައްގީކުރާ އެމްޕަވަރމަންޓް ހަބަކީ ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްގީކުރުމާއި، މަސައްކަތުގެ ތަޖުރިބާއާއި، އިގްތިސާދީ މިނިވަންކަމަށް މަގުފަހިކޮށްދޭ ފުރުސަތުތައް ހޯދައިދިނުމުގެ މަގުސަދުގައި ތަރައްޤގީކުރާ ތަނެއް ކަމަށް އާތިފް ވިދާޅުވިއެވެ.

އާތިފް ވިދާޅުވީ،އެ ހަބަކީ، މިނިވަންކަމާއެކީ އެފަރާތްތަކަށް މާނަހުރިގޮތެއްގައި މުޖުތަމައުގައި ބައިވެރިވާނެ ފުރުސަތުތައް ހޯދައިދިނުމަކީވެސް މި ހަބް ތަރައްގީކުރުމުގެ ބޭނުމެއް ކަމަށެވެ.

އެގޮތުން މީހުންނާއި މުއާމަލާތްކުރުމުގެ ހުނަރާއި، އިޖްތިމާއީ ގުޅުންތައް ބަދަހިކުރުމުގެ ހުނަރުގެ އިތުރުން، ވަޒީފާގެ މާހައުލުގައި އެއްތަނެއްގައި އިންދެ މަސައްކަތްކުރުމުގެ ގާބިލުކަންވެސް ދަސްކުރުވުމަކީ މުހިންމުކަމެއް ކަމަށް އާތިފް ވިދާޅުވިއެވެ. އަދި މި ހަބް ތަރައްގީކުރަނީ މިފަދަ ހުރިހާ ހުނަރުތަކެއް އެއްތަނަކުން ފޯރުކޮށްދިނުމުގެ މަގުސަދުގައި ކަމަށާއި، މިހާރު ހަބެއް ތަރައްގީކުރާނެ ތަނެއް ހަމަޖެހިފައިވާ ކަމަށްވެސް އާތިފް ވިދާޅުވިއެވެ.

މި ހަބް ގާއިމްކުރުމަށް ވަކި ޖާގައެއް ކަނޑައެޅި، މި މަޝްރޫއު ފެށުމުގެ މަރުހަލާގެ މަސައްކަތް މިހާރު ކުރިއަށްދާ ކަމަށާއި، ކުރިއަށްއޮތް ތިން މަސް ނުވަތަ ހަތަރު މަސް ދުވަހުގެ ތެރޭގައި އެ ހަބްގެ މަސައްކަތް ނިންމާ އެ ތަނުން ނުކުޅެދުންތެރިކަން ހުންނަ ފަރާތްތަކަށް ޚިދުމަތް ދެވިގެންދާނެ ކަމަށް އާތިފް ވިދާޅުވިއެވެ.

އާތިފް ވިދާޅުވީ، ސްކޫލް މަރުހަލާ ނިމުމާއެކު، ނުކުޅެދުންތެރިކަން ހުންނަ ކުދިން ބާރުވެރިކުރުވުމަށް އަދިވެސް މަސައްކަތްކުރަން ޖެހޭ ކަމަށެވެ. މީގެ ތެރޭގައި އެ ކުދިން މުޖުތަމައަށް ތައްޔާރުކުރުވުމާއި، ވަޒީފާގެ މައިދާނަށް ނެރުމަށްޓަކައި ވަރަށް ގިނަ ކަންތައްތަކެއް ކުރަންޖެހޭ ކަމަށް ވެސް އާތިފް ވިދާޅުވިއެވެ.

މީގެ އިތުރުން އާތިފް ވިދާޅުވީ، އެމްޕަވަރމަންޓް ހަބްގައި ހޮސްޕިޓަލިޓީ އަދި ކަލިނަރީ ތަމްރީނާއި މަސައްކަތުގެ ތަޖުރިބާ ފޯރުކޮށްދިނުމަށްޓަކައި އިންކްލޫސިވް ކެފޭ އަކާއި، ނުކުޅެދުންތެރިކަން ހުންނަ ފަރާތްތައް އުފައްދާ ތަކެތި މާކެޓްކޮށް ވިއްކުމަށް އާންމުންނަށް ހުޅުވާލެވިފައިވާ ފިހާރަ އެއް ހުންނާޏޭ ކަމަށެވެ. އަދި ހަބްގެ ހަރަކާތްތަކުގައި ބައިވެރިވާ ފަރާތްތަކުގެ ޝައުޤުވެރިކަމާއި ގުޅުންހުރި، ހުނަރު ތަރައްގީ ކުރުމަށް ތަފާތު ޕްރޮގްރާމްތައް ހިންގުމަށް ހަބްގައި 3 ވޯރކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއްވެސް ހުންނާނެ ކަމަށް އާތިފް ވަނީ ވިދާޅުވެފައެވެ.