މިދިޔަ އަހަރުގެ ޑިސެމްބަރު މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 84 މައްސަލައެއް ރިޕޯޓްކޮށްފައިވާ ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ.

އެ ވުޒާރާގެ ތަފާސްހިސާބުތަކުން ދައްކާ ގޮތުގައި ޑިސެމްބަރު މަހު ހުށަހަޅާފައި މައްސަލަތަކުގެ ތެރެއިން ކުޑަކުދިންނަށް އަނިޔާކުރުމުގެ 84 މައްސަލައެއް ވަނީ ހުށަހަޅައިފައެވެ.

Ad by Hajj Corporation

ކުޑަކުދިންނަށް ކުރާ އަނިޔާގެ މައްސަލަތަކުގައި ޑިސެމްބަރު މަހު އެންމެ ގިނައީ އިހުމާލުވުމުގެ މައްސަލައެވެ. އެގޮތުން އެ ބާވަތުގެ 25 މައްސަލަ ރިޕޯޓުކޮށްފައިވެއެވެ. އޭގެ ތެރޭގައި ހިމެނެނީ 10 ފިރިހެން ކުދިންގެ މައްސަލައަކާއި 14 އަންހެން ކުދިންގެ މައްސަލައެވެ.

ތަފާސްހިސާބުތަކުން ދައްކާ ގޮތުގައި ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ ޖިންސީ ހާނިއްކައިގެ މައްސަލައެވެ. އެގޮތުން އެ ބާވަތުވެ 15 މައްސަލައެއް އެ މަހު ރިޕޯޓްކޮށްފައިވެއެވެ. އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ 13 މައްސަލައަކާއި އަންހެން ކުދިންނާއި ގުޅޭ ތިން މައްސަލައެވެ.

ޖިސްމާނީ ހާނިއްކައިގެ 14 މައްސަލަ، ނަފްސާނީ ހާނިއްކައިގެ ހަ މައްސަލަ، އެހެން ކުދިންގެ ފަރާތުން ގަނާ ލިބުމުގެ ތިން މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 11 މައްސަލަ، ބިރުދެއްކުމުގެ ގޮތުން ކުރެވޭ ކަންކަން ބްލެކްމެއިލް ކުރުމުގެ ދެ މައްސަލަ، އިންޓާނެޓް މެދުވެރިކޮށް ކުޑަކުދިންނަށް ޖިންސީ "ގްރޫމިންގް" ކުރުމުގެ ދެ މައްސަލަ އަދި އެކި ކަހަލަ ކުށްތަކަށް އަރައިގަންނަ ޖަމާއަތުގައި ކުޑަކުދިން ނަހަމަ ގޮތުގައި ބޭނުންކުރުމުގެ އެއް މައްސަލައެއް ވަނީ ރިޕޯޓުކޮށްފައި ކަމަށް ވެސް ތަފާސްހިސާބުތަކުން ދައްކައެވެ.

ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ މައްސަލަތަކާއި ގުޅިގެން ޑިސެމްބަރު މަހު އެ ވުޒާރާއަށް ރިޕޯޓުކޮށްފައިވަނީ އަންހެން ކުދިންގެ 40 މައްސަލައަކާއި ފިރިހެން ކުދިންގެ 44 މައްސަލައެކެވެ.