ފުޓްބޯޅައި ދުނިޔޭގެ ފަހުގެ ތާރީޚުއްގައި ފެނުނު އެންމެ މޮޅު ދެކުލުންތެރިންކަމަވާ މެސީ އާއި ރޮނާލްޑޯ އިންޑިޔާއަށް އައުމަށް ހަމަޖެހިއްޖެއެވެ. މި ޙަބަރާއެކު މިއީ ފުޓްބޯޅައަށް ސަޕޯޓްކުރާ ގިނަ ބަޔަކު އުޅޭ ސައުތު އޭޝިޔާ އަދި ޙާއްސަކޮށް އިންޑިޔާގެ ސަޕޯޓަރުންނަށް އުފާވެރިހަބަރެކެވެ. އަދި މިއުފާވެރިކަން ހާއްސަވަނީ، އިންޑިޔާގެ ސަޕޯޓަރުންނަށް ރޮނާލްޑޯ ދަނޑުމަތިން ފެނުމުގެ ފުރުސަތު އޮތުމުންނެވެ.

ފަސް ފަހަރު ބެލަން ޑި'އޯރް ކާމިޔާބުކޮށްފައިވާ ރޮނާލްޑޯ އިންޑިޔާގެ ދަނޑެއްމަތީން ކުލުމުގެ ފުރުސަތު ލިބިގެންދާނީ މިއަދު ގުރުއަތުލި އޭއެފްސީ ޗެމްޕިއަންސް ލީގުގެ ތެރެއިންނެވެ. އޭނާގެ ޓީމު އަލް ނަސްރު ވަނީ ގްރޫޕް ޑީގައި އިންޑިޔާގެ އެފްސީ ގޯވާ، އިރާގުގެ އަލް ޒަވްރާ އަދި ތަޖިކިސްތާނުގެ އެފްސީ އިސްތިގްލޯލްއާ އެކުގައެވެ. 40 އަހަރުގެ ރޮނާލްޑޯގެ ސްޓެޗޫއެއްވެސް މީގެކުރިން ބަހަށްޓާފައިވާ ގޯއާގެ ސަޕޯޓަރުންނަށް މިއީ ޚާއްސަކޮށް ލިބިގެން ދިޔަ ވަރަށްވެސް އުފާވެރި ހަބަރެކެވެ.

މީގެއިތުުރުން ގިނަ ބަޔަކު ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ކަމަށް ދެކޭ ލިއޮނެލް މެސީ ވެސް މިއަހަރުގެ ޑިސެމްބަރު 13 އިން 15 އަށް އިންޑިޔާއަށް ޒިޔާރަތްކުރުމަށް ވަނީ ހަމަޖެހިފައެވެ. މި ދަތުރުގައި އެއްވެސް މެޗެއް ނުކުޅުނު ނަމަވެސް މެސީ ބައިވެރިވާނީ ކޮލްކަތާ، ދިއްލީ، މުންބާއީ އަދި އަހްމަދާބާދުގައި ބޭއްވޭ ފުޓްބޯޅައާ ގުޅުންހުރި އެކި ހަރަކާތްތަކުގައެވެ. އެހެހްކަމުން އިންޑިޔާގެ ފުޓްބޯޅައަށް ލޯބިކުރާ ފަރާތްތަކަށް މެސީ ހަމަލޮލަށް ފެނުމުގެ ފުރުސަތު ފަހިވެގެންދާނެއެވެ.

ފާއިތުވެދިޔަ ވިއްސަކަށް އަހަރު ދުވަހު ދުނިޔޭގެ ފުޓްބޯޅައިގެ އެންމެ މަތީ ފަންތީގައި ތިބި މި ދެ ތަރި އެއްފަހަރާ އިންޑިޔާއަށް ޒިޔާރަތްކުރުމަކީ އިންޑިޔާގެ ފުޓްބޯޅަ ލޯބިވެރިންނަށް ލިބޭ ވަރަށް ހާއްސަ ފުރުސަތެކެވެ. މިހާރުވެސް ސްޓޭޑިއަމްތަކާއި ފޭން ޒޯންތަކުގައި މި ދެ ތަރި ބަލާލުމަށް ޝައުގުވެރިކަން ފާޅުކުރާ މީހުންގެ އަދަދު އިތުރުވަމުންދާއިރު، އުއްމީދު ކުރެވެނީ އިންޑިޔާގެ ފުޓްބޯޅައަށް މި ދެ ތަރީގެ ޒިޔާރަތާއެކު އާ ދިރުމެއް ލިބިގެންދާނެ ކަމަށެވެ.