މެދުއިރުމަތީގައި އުފެދިފައިވާ ނުތަނަވަސްކަމުގެ ސަބަބުން، ކްރިސްޓިއާނޯ ރޮނާލްޑޯ ކުޅެމުންދާ ސައުދީ އަރަބިއްޔާގެ އަލް ނަސްރުން އޭއެފްސީ ޗެމްޕިއަންސް ލީގު ޓޫގެ ކުއާޓާ ފައިނަލުގައި ޔޫއޭއީގެ އަލް ވަސުލްއާ ދެކޮޅަށް ކުޅެން އޮތް މެޗު ފަސްކޮށްފިއެވެ. ދުބާއީގައި ކުޅުމަށް ހަމަޖެހިފައިވާ މި މެޗު ފަސްކުރި ނަމަވެސް، މެޗު ދެން ކުޅޭނެ ތާރީޚެއް އަދި އިއުލާނެއް ނުކުރެއެވެ.

މި މެޗު ފަސްކުރަން ނިންމީ މިދިޔަ ހަފުތާ ބަންދުގައި އެމެރިކާއިން އީރާނާ ދެކޮޅަށް ހިންގި އަސްކަރީ އޮޕަރޭޝަނަކާ ގުޅިގެންނެވެ. މި އޮޕަރޭޝަނުގައި އީރާނުގެ އެންމެ މަތީ ލީޑަރު އަލީ ޚާމަނާއީ އަވަހާރަކޮށްލާފައިވާ ކަމަށް ރިޕޯޓުތައް ބުނާއިރު، އީރާނުން ވަނީ މީގެ ބަދަލުހިފުމުގެ ގޮތުން އެ ސަރަހައްދުގައި ހުރި އެމެރިކާ އާއި އިޒްރޭލުގެ އަސްކަރީ މަރުކަޒުތަކަށް ހަމަލާދީފައެވެ.

Ad by Hajj Corporation

އޭޝިއާގެ ފުޓްބޯޅަ ފެޑެރޭޝަން (އޭއެފްސީ) އިން ނެރުނު ބަޔާނެއްގައި ބުނެފައިވަނީ، "މެދުއިރުމަތީގައި ހިނގަމުންދާ ކަންތައްތަކަށް ރިއާޔަތްކޮށް، ހުޅަނގު ސަރަހައްދުގެ އޭއެފްސީ ޗެމްޕިއަންސް ލީގު އެލީޓްގެ ގަދަ 16 ގެ ފުރަތަމަ ލެގުގެ މެޗުތައް މިހާރު ވަނީ ފަސްކުރެވިފައި،" ކަމަށެވެ. މީގެ އިތުރުން ހުޅަނގު ސަރަހައްދުގެ ޓީމުތައް ހިމެނޭ އޭއެފްސީ ޗެމްޕިއަންސް ލީގު ޓޫ އަދި އޭއެފްސީ ޗެލެންޖް ލީގުގެ ކުއާޓާ ފައިނަލް މެޗުތައް ވެސް ވަކި ގޮތެއް އަންގަންދެން ފަސްކޮށްފައިވާ ކަމަށް އެ އިދާރާއިން ބުނެއެވެ.

އޭއެފްސީން އިތުރަށް ބުނި ގޮތުގައި އިރުމަތީ ސަރަހައްދުގެ ކްލަބުތަކުގެ މެޗުތައް ތާވަލާ އެއްގޮތަށް ކުރިއަށްދާނެއެވެ. އަދި އެ އިދާރާގެ އެންމެ ބޮޑު އިސްކަމަކީ ކުޅުންތެރިންނާއި، އޮފިޝަލުން އަދި ސަޕޯޓަރުންގެ ސަލާމަތާއި ރައްކާތެރިކަން ކަމަށް ވެސް ފާހަގަކޮށްފައިވެއެވެ.

މެޗު ފަސްކުރިކަން އިއުލާނުކުރި އިރު، އަލް ނަސްރުގެ ކެޕްޓަން ރޮނާލްޑޯއަށް އަނިޔާގެ ބިރެއް ވަނީ ކުރިމަތިވެފައެވެ. ރޮނާލްޑޯގެ ކަކުލުގައި އައިސްޕެކް އަޅައިގެން ހުއްޓާ ފެނިފައިވާއިރު، އެ ޓީމުގެ ކޯޗު ޖޯޖް ޖީސަސް ބުނީ "ރޮނާލްޑޯގެ މަސްގަނޑަށް ވަރުބަލިކަން އިހުސާސް ކުރެވިފައިވާ ކަމަށާއި، އޭނާގެ ހާލަތު ދެނެގަތުމަށް މެޑިކަލް ޓީމުން އަވަސް ޓެސްޓުތަކެއް ހަދާނެ" ކަމަށެވެ.