ލަލީގާގެ ޗެމްޕިއަން ބާސެލޯނާއިން މި ސީޒަންގެ ލަލީގާގެ ފުރަތަމަ މެޗު ފަސޭހަ ކަމާއެކު ކާމިޔާބުކޮށްފިއެވެ. މިމެޗު ބާސާއިން ކާމިޔާބުކުރީ 3-0 އިންނެވެ. މަޔޯކާގެ އަމިއްލަ ދަނޑުގައި ކުޅުނު މިމެޗުގައި ރެފްރީގެ ނިންމުންތަކާމެދު ގިނަ ސުވާލުތަކެއް އުފެދިފައިވެއެވެ.

މެޗުފެށިގެން އެންމެ 7 މިނެޓުގައި މިދިޔަ ސީޒަނުގެ ލަލީގާގެ މޮޅުކުޅުންތެރިޔާ ރަފީނިޔާ ވަނީ ޔަމާލްގެ އެސިސްޓަކާއެކު ގޯލެއް ޖަހާފައެވެ. މިމެޗުގައި ރެފްރީންގެ ނިންމުންތަކާމެދު ސުވާލު އުފެދޭންފެށި 23 ވަނަ މިނެޓުގައި ފެރާން ޖެހިގޯލާއެކީގައެވެ. މިގޯލު ޖެހުމުގެ ކުރިން މަޔޯކާގެ ކުޅުންތެރިޔެއްގެ ބޮލަށް އަނިޔާވެ ވެއްޓިފައި އޮތުމާއެކު ރެފްރީ ކަށިގަނޑު ފުމަން އަނގަޔަށް ކަށިގަނޑު ލުމާއެކު މަޔޯކާގެ ކުޅުންތެރިން ވަނީ ކުޅުން ހުއްޓާލާފައެވެ. ނަމަވެސް ރެފްރީގެ ކަށިގަނޑުގެ އަޑުގެ ކުރީން ޓޮރޭސް ވަނީ ގޯލު ކާމިޔާބުކޮށްފައެވެ. އެހެންކަމުން ޤަވާއިދުގައި އޮންނަގޮތުން މިގޯލް ކެންސަލް ކުރެވޭނެ ގޮތެއް ނެތެވެ. މަޔޯކާގެ ކުޅުންތެރިންގެ ހިތްހަމަ ނުޖެހުމަކީ ރެފްރީ ކަށިގަނޑު ފުމުން ލަސްކުރުމުންނެވެ.

މީގެ އިތުރުންވެސް މަޔޯކާގެ ދެކުޅުންތެރިޔަކަށް ފުރަތަމަ ހާފުގައި ރަތްކާޑު ދެއްކުމާއެކު މެޗު އިތުރަށް ހޫނުވާން ފެށިއެވެ. މައްސަލަ ދެވަނަ ފަހަރަށް ގޯސްވެގެންދިޔައީ ފުރަތަމަ ހާފުގެ ފަހުވަގުތުގައި ރަފީނިޔާ ކުރި ނުރައްކާތެރި ފައުލަކަށް ރެފްރީ ރީނދޫ ކާޑުދެއްކުމާއި ގުޅިގެންނެވެ. މިހިސާބުން ފެށިގެން މެޗުގެ ބާކީބައި ފެނިގެންދިޔައީ ވަރަށް ހޫނުކޮށެވެ. ފާހަގަކޮށްލެވޭ އަނެއްކަމަކީ މިމެޗުގެ ރެފްރީގެ ނިންމުންތަކާއި ދެކޮޅަށް ވަރަށް ބޮޑަށް ފާޑުކިޔަ މިދިޔަ ސީޒަނުގައި މިރެފްރީ އާއި ދެކޮޅަށް ލަލީގާއަށް މެޑްރިޑުން މައްސަލަވެސް ހުށަހަޅާފައިވާކަމެވެ.

މެޗުގެ ދެވަނަ ހާފުގައި ދެ ކުޅުންތެރިން މަދުން ކުޅެން ޖެހުމާ ގުޅިގެން މަޔޯކާ ކުޅުނީ ބަސް ޕާކުކޮށްގެންނެވެ. ރޭގެ މެޗު ނިމުމުގެ ކުރިން ލަމީން ޔަމާލް ވެސް ވަނީ އިތުރު ލަނޑެއް ޖަހާފައެވެ.

2019 ވަނަ އަހަރުން ފެށިގެން ލަ ލީގާގައި ވިދިވިދިގެން އެއްވެސްޓީމަކަށް ޗެމްޕިއަންކަން ހޯދިފައިނުވާއިރު، ބާސެލޯނާއިން މި ސީޒަނަށް ނިކުމެފައިވަނީ ތާރީޚު ބަދަލުކޮށް ލީގު ތަށި އަނބުރާ ހޯދުމުގެ އުއްމީދުގައެވެ.