މި މަހުގެ 25 ވަނަ ދުވަހުން ފެށިގެން އަމަލު ކުރަން ނިންމާފައިވާ، ދިވެހިރާއްޖޭގައި ނުރައްކާތެރި އަދި އިންތިޒާމުވެގެން ހިންގާ ބޮޑެތި ކުށްކުރުން ހުއްޓުވުމަށްޓަކައި ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް ފުލުހުން ތައްޔާރުވެފައިވާ ކަމަށް ޗީފް އިންސްޕެކްޓާ އޮފް ޕޮލިސް ޖަމްޝީދް އަލީ ވިދާޅުވެއްޖެއެވެ.

ޖަމްޝީދް މި ފަދައިން ވިދާޅުވީ، މެންދުރުޓީވީގެ މައުޟޫ ޕޮރޮގްރާމުގައި ކުޑަކުދިން ކުށުގެ ވެއްޓަށް ހުށަހެޅޭ މިންވަރު އިތުރުވަމުން ދާތީ އެކަމުގެ ކަންބޮޑުވުން ފާޅުކުރައްވައި ވާހަކަ ދައްކަމުންނެވެ.

Ad by Hajj Corporation

އެގޮތުން މި މަހުގެ 25 ގައި އަމަލުކުރަން ފަށާ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް އަމަލުކުރަން ފެށުމަށް ފުލުހުން ވަމުން އަންނަ ފަހުގެ ތައްޔާރީ ތަކާ ގުޅޭ ގޮތުން ސުވާލު ކުރުމުން ޖަމްޝީދް ވިދާޅުވީ، މި ބިލަށް ފުލުހުން ވަރަށް ބޮޑަށް ތައްޔާރުވެފައިވާ ކަމަށާއި، އެކަމަށް ލާޒިމު ކޮށްފައިވާ ގަވާއިދުތަކެއް ހެދުމުގެ ހުރިހާ ކަމެއްވެސް ކުރިއަށްދާ ކަމަށެވެ.

ޖަމްޝީދް ވިދާޅުވީ، އެގޮތުން އެކުށްތަށް ތަހުގީގު ކުރާ އިންވެސްޓިގޭޝަން އޮފިސަރުން ތަމްރީނު ކޮށް، ގާނޫނުނަށް އަހުލުވެރިކުރުވުމަށް އެ އޮފިސަރުންނަށް ސެޝަންތަކެއްވެސް ކުރިއަށް ގެންގޮސްފައިވާ ކަމަށާއި، އަދި އެ މަސައްކަތުގައި އަމަލީ ގޮތުން މަސަކަތްކުރާ އޮޕަރޭޝަނަލް މުވައްޒިފުންނަށް ބޭނުންވާ މައުލޫމާތުތަށް މިހާރު ދީ ނިމިފައިވާ ކަމަށް ވިދާޅުވިއެވެ.

"އަޅުގަނޑުމެންގެ އުންމީދަކީ، މި ގާނޫނު ތަންފީޒު ކުރެވިގެން ދާ އިރު މީގެ ނަތީޖާ އިރާދު ކުރެއްވިއްޔާ ނެރެވޭނެ ކަމަށް، މި ގާނޫނަކީ މުޖުތަމައު އަށް އަދި މި ދިވެހި ގައުމަށް ފައިދާ ހުރި ގާނޫނަކަށް ވެގެން ދާނެ ކަމަށް." ޗީފް އިންސްޕެކްޓާ އޮފް ބޮލިސް ޖަމްޝީދް އަލީ

ކުޑަކުދިންގެ ކަންތަށްތަކުގައި ހާއްސަ ގޮތްތަކެއް ގެންގުޅޭނެކަން ފާހަގަކުރަށްވައި ޖަމްޝީދް ވިދާޅުވީ، އެފަދަ ކަންކަން ފަސޭހައިން ފުލުހުންނާއި ހަމައަށް ވާސިލުވާނެ ގޮތްތަށް ވެސް ހަމަޖައްސާފައިވާނޭ ކަމަށެވެ.

ގޭންގް ކުށްތައް ހުއްޓުވުމަށްޓަކައި ސަރުކާރުން މިދިޔަ 18 މަސްދުވަހުގެ ތެރޭގައި މުހިންމު މަސައްކަތްތަކެއް ވަނީ ކޮށްފައެެވެ. އެގޮތުން، ގޭންގް ކްރައިމް އެންފޯސްމެންޓްގެ ނަމުގައި ވަކި ވިންގެއް ދިވެހި ފުލުހުންގެ ހިދުމަތުގައި 2024 ވަނަ އަހަރު ޖުލައި 1 ވަނަ ދުވަހު ވަނީ ގާއިމު ކޮށްފައެވެ. އެގޮތުން ގޭންގު ކުށްތަކާ ގުޅޭ މައްސަލަތަކުގައި މިދިޔަ 18 މަސްދުވަހު، ގްރޫޕުތައް އެއްވެ އުޅޭ ސަރަހައްދުތަކުން 31،511 މީހުން ހުއްޓުވައި ސުވާލުކޮށް އެކި މައްސަލަތަކުގައި 180 މީހަކު ހައްޔަރުކުރެވި، އޭގެ ތެރެއިން 83 މީހަކާ ދެކޮޅަށް ދައުވާ އުފުލާފައިވެއެވެ. މި މުއްދަތަށް ބަލާއިރު، ގޭންގު މާރާމާރީގައި، އެއްވެސް މީހެއްގެ ފުރާނަ ގެއްލިގޮސްފައެއްނުވެއެވެ.

މި ބިލަކީ، 15 މޭ 2025 ވީ ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 32 ވަނަ ޖަލްސާގައި ފާސްކުރެއްވި ބިލެކެވެ.