ވީހާވެސް ގިނަ ދަރިވަރުންނަށް ފުރުޞަތު ދިނުމުގެ ގޮތުން މާލެއާއި ހުޅުމާލޭގައި ހުންނަ ސީއެޗްއެސްއީއަށް ވަންނަ ދަރިވަރުންގެ އަދަދަށް ބަލައި އެ ދެ ސްކޫލުގައި ދެ ދަންފަޅިއަށް ކިޔަވައިދޭން އެޑިޔުކޭޝަން މިނިސްޓްރީން ނިންމައިފިއެވެ.

އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ހުސައިން ސައީދު، ޓީވީއެމްގެ ރާއްޖެ މިއަދު ޕްރޮގްރާމުގައި ރޭ ވިދާޅުވީ، ސީއެޗްއެސްއީ ހުޅުމާލެއާއި މާލޭގައި ޖާގަ އިތުރު ކުރުމުގެ މަސައްކަތް ކުރިއަށް ގެންދާ ކަމަށާއި، ވީހާވެސް ގިނަ ކުދިންނަށް ފުރުޞަތު ދިނުމުގެ ގޮތުން، އަންނަ ދިރާސީ އަހަރު އޭލެވެލްގެ ކިޔެވުން އެ ދެ ސްކޫލުގައި ފަށާނީ ދެ ދަންފަޅިއަށް ކަމަށެވެ.

Ad by Hajj Corporation

މި ދެ ސްކޫލުގައި މިހާރު ކިޔަވައިދެމުން އަންނަނީ އެއް ދަންފަޅިއަށެވެ. ދިރާސީ ކަލަންޑަރުގައިވާ ގޮތުން އޭލެވެލްގެ ކިޔެވުން ފަށަން މި އަހަރު ކަނޑައަޅާފައި ވަނީ އަންނަ ސެޕްޓެމްބަރު މަހުގެ 14 ވަނަ ދުވަހެވެ.

ސީއެޗްއެސްއީގެ ދެ ސްކޫލުގެ 11އަށް ވަންނަން ހުޅުވާލީ މި މަހު 19 ވަނަ ދުވަހުއެވެ. މުއްދަތު އަންނަ މަހުގެ 4 ވަނަ ދުވަހަށް ހަމާވާއިރު، ތިން ދުވަސް ތެރޭ 900 ދަރިވަރުން އެ ދެ ސްކޫލަށް ވަންނަން އެޕްލިކޭޝަން ފޯމް ހުށައަޅާފައިވެއެވެ.

އޭލެވެލް ކިޔަވާ ދަރިވަރުން އިތުރު ކުރުމުގެ ގޮތުން، ކުރީގެ ސީއެޗްއެސްސީ އަލުން އިއާދަކޮށް، އަތޮޅު ތެރޭގެ 23 ސްކޫލެއްގައި ޕައިލެޓް ޕްރޮގްރާމެއް މިދިޔަ އަހަރު ކުރިއަށް ގެންގޮސްފައިވެއެވެ. އެޑިޔުކޭޝަން މިނިސްޓްރީން ބުނީ އެ ޕްރޮގްރާމް ކާމިޔާބު ކަމަށެވެ.

އޭލެވެލްއަށް ކިޔަވާ ދަރިވަރުން އިތުރު ކުރުމުގެ ގޮތުން އޭލެވެލްއަށް ވަންނަ ދަރިވަރުންގެ ކުރައިޓީރިއާއަށް ބޮޑު ބަދަލެއް އެޑިޔުކޭޝަން މިނިސްޓްރީން ވަނީ ގެނެސްފައެވެ. އޯލެވެލްއަށް ކިޔެވޭނެ ތިން މަގެއް ކަނޑައަޅައި އެއިން ކޮންމެ މަގަކުން ވެސް އޭލެވެލްއަށް ދެވޭނެ ފަހި ފުރުޞަތުތަކެއް އެޑިޔުކޭޝަން މިނިސްޓްރީން ވަނީ ފަހިކޮށްދީފައެވެ.