ޕާކިސްތާނަށް މިހާރު ކުރަމުންދާ ވިއްސާރައިގައި ބޯކޮށް ވާރޭ ވެހި ބިންގަނޑު ކަނޑައިގެން ދިއުމާ ގުޅިގެން އެ ގައުމުގެ އުތުރުގެ ސަރަހައްދުތަކަށް ދަތުރު ކުރުމުގައި ސަމާލުވުމަށް އެގައުމުގެ ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއޭމްއޭ) އިން އިލްތިމާސްކޮށްފިއެވެ.

މި ވިއްސާރައިގެ ސަބަބުން މިހާތަނަށް 300 އަށް ވުރެ ގިނަ މީހުން މަރުވެ އެތައް ބަޔަކު ވަނީ ހާލުގައި ޖެހިފައެވެ.

Ad by Hajj Corporation

އޮގަސްޓް މަހުގެ ނިޔަލަށް ޕާކިސްތާނަށް ވިއްސާރަ ކުރާނެކަމަށް އެގައުމުގެ ކަމާ ބެހޭ މާހިރުން ލަފާކޮށްފައިވާއިރު، ވިއްސާރާގައި ކޯރުތައް ބަންޑުންވެ ބިންގަނޑުތިރި ހިސާބުތަކުގައި ދިރިއުޅެމުންދާ ފަރާތްތަކަށް ވަނީ ބޮޑެތި ގެއްލުންތަކާ ކުރިމަތިލާން ޖެހިފައެވެ.

ރިޕޯޓްތައް ބުނާގޮތުން، ކުރިއަށް އޮތް މަސްތަކުގައި ވެސް ޕާކިސްތާނަށް ބޯކޮށް ވާރޭ ވެހޭނެއެވެ. މިކަމުގެ ސަބަބުން ބިންގަނޑު ކަނޑައިގެން ދިއުމާއި ފެން ބޮޑުވުމާއި ދަތުރުފަތުރުގެ ނިޒާމަށް ބުރޫ އަރާނެ ކަމަށް މީޑިއާ ރިޕޯޓްތައް ބުނެއެވެ

ޕާކިސްތާނުގެ ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނީ މިއީ އާންމުގޮތެއްގައި ޖުލައި މަހުން ފެށިގެން ސެޕްޓެމްބަރު މަހުގެ ނިޔަލަށް ދެމިގެންދާ ވިއްސާރައެއްކަމަށެވެ.

އެންޑީއެމްއޭއިން ނެރެފައިވާ އިންޒާރުގައި، ޓޫރިސްޓުންނާއި ރައްޔިތުންވެސް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށާއި މޫސުމާ ބެހޭ އެންމެ ފަހުގެ މައުލޫމާތު ހޯދުމަށް އިލްތިމާސްކޮށްފައިވެއެވެ. އަދި މި ނުރައްކާތެރި މޫސުމުގައި އާންމުންނަށް ވަރަށް ބޮޑެތި ދަތިތަކަކާ ކުރިމަތިވެދާނެކަމުގެ އިންޒާރުވެސް ދީފައި ވެއެވެ.