ޔަމަނުގެ އިތުރުން ފަލަސްޠީނުގެ ޣައްޒާއަށް ޔަހޫދީ ފައުޖުން ވަރުގަދަ ޙަމަލާތަކެއްދީ، ގިނަ އަދަދެއްގެ ބަޔަކު ޝަހީދު ކޮށްލައިފިއެވެ. 

ޣައްޒާ ސިޓީގެ ރައްޔިތުން ބުނީ ޔަހޫދީ ފައުޖުގެ ގިނަ ޙަމަލާތައް އަމާޒު ކޮށްފައި ވަނީ ޢާންމުންގެ ގެދޮރަށް ކަމުގައެވެ. މި ގޮތުން، ޛަޔިތޫނާއި ޝަޖާޢައްޔަށް ޔަހޫދީ ފައުޖުގެ އަސްކަރީ މަތިންދާބޯޓުތަކުން ވަނީ މެދުކެނޑުމެއް ނެތި ބޮން އަޅާފައެވެ. އަދި، އަސްކަރީ ޓޭންކުފަހަރު ބޭނުން ކޮށްގެން އެ ސަރަޙައްދުގައި އޮތް ޞަބްރާ އަވަށާއި، ޣައްޒާ ސިޓީގެ އުތުރުގައި އޮތް ޖަބާލިޔާއަށް ވެސް ނިރުބަވެރި ޙަމަލާތަކެއް ދިނެވެ.

Ad by Hajj Corporation

 ޣައްޒާއަށް ދީފައިވާ ޙަމަލާތައް އަމާޒު ކޮށްފައި ވަނީ އެ ސަހަރުގެ އެންމެ އުތުރުގައި އޮތް ޣައްޒާ ސިޓީގެ އުތުރާއި އިރުމަތީގެ ސަރަޙައްދުތަކަށެވެ. މިއީ، ޣައްޒާ ސިޓީ އިސްތިޢުމާރުކޮށް، އެ ސަހަރުގައި ދިރިއުޅޭ ރައްޔިތުން އަޅުވެތި ކުރުމަށް ޔަހޫދީން ފަށާފައިވާ ލާއިންސާނީ ޖަރީމާތަކުގެ ދަށުން ދީފައިވާ ނިރުބަވެރި ޙަމަލާތަކެކެވެ.

ޣައްޒާ ސިޓީ އިސްތިޢުމާރު ކުރުމަށް ކުރިއަށް އޮތް ހަފުތާތަކުގެ ތެރޭގައި ވަރުގަދަ އޮޕަރޭޝަނެއް ފަށާނެ ކަން ޔަހޫދީ ފައުޖުން އިޢުލާނު ކޮށްފައިވާއިރު، މިހާރު ވެސް އެ ސަރަޙައްދަށް ދަނީ ވަރުގަދަ ޙަމަލާތައް އަމާޒު ކުރަމުންނެވެ. ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ މުޖާހިދުން ނައްތައިލުމުގެ ނަމުގައި ޣައްޒާ ސިޓީއަށް ދޭން ފަށާފައިވާ ނިރުބަވެރި ޙަމަލާތަކުގެ ބޭނުމަކީ، އެ ސަހަރުގައި ދިރިއުޅޭ މިލިޔަނެއްހާ މީހުން އަމިއްލަ ވަަޒަނުން ބޭރު ކުރުމެވެ.

އޮގަސްޓު 22 ވަނަ ދުވަހު ޙޫޘީން ވަނީ ޒަޔަނިސްޓުންގެ ރަށްތަކަށް އަމާޒުކޮށް ބެލިސްޓިކް މިސައިލެއް ބޭނުން ކޮށްގެން ވަރުގަދަ ޙަމަލާއެއް ދީފައެވެ. ޙޫޘީން ބޭނުން ކޮށްފައި ވަނީ، މީގެ ކުރިން ބޭނުން ކޮށްފައި ނުވާ ބާވަތެއްގެ ނުރައްކާތެރި ބެލިސްޓިކް މިސައިލެކެވެ. އެ ބެލިސްޓިކް މިސައިލްގައި ގިނަ އަދަދެއްގެ ގޮވާތަކެތި ހުރި ކަމަށާއި، މިއީ ޙޫޘީންގެ ޙަމަލާއެއްގައި އެ ބާވަތުގެ މިސައިލެއް ބޭނުން ކޮށްފައިވާ ފުރަތަމަ ފަހަރު ކަން ޔަހޫދީ އަސްކަރިއްޔާގެ އޮފިޝަލަކު ވެސް ވަނީ ކަށަވަރު ކޮށްދީފައެވެ. ޔަހޫދީ ފައުޖުން އެ މިސައިލް ދިފާޢުކޮށްފައިވާ ކަން ނުވަތަ ނޫން ކަން ސާފެއް ނޫނެވެ.

ޣައްޒާ ސިޓީގައި ދިރިއުޅޭ ރައްޔިތުން ހައިހޫނުގައި ޖެހިފައިވާ ކަމުގައި ބައިނަލްއަޤްވާމީ ޖަމުޢިއްޔާތަކުން ވަނީ ބުނެފައެވެ. ނަމަވެސް، ޔަހޫދީންގެ ނިރުބަވެރި ދިފާޢީ ވަޒީރު އިސްރައެލް ކަޓްޒް ބުނީ، ޣައްޒާ އިސްތިޢުމާރު ކުރުމަށް ފަށާފައިވާ އޮޕަރޭޝަން ހުއްޓުމެއް ނެތި ކުރިއަށް ގެންދާނެ ކަމުގައެވެ. މި ކަމާ މެދު ބައިނަލްއަޤްވާމީ މުޖުތަމަޢުން ދަނީ ކަންބޮޑުވުން ފާޅު ކުރަމުންނެވެ. އަދި، ޣައްޒާ އިސްތިޢުމާރު ކުރުމާ ދެކޮޅަށް އަޑު އުފުލަމުންނެވެ.