އިންޑިޔާ އާއި ޗައިނާގެ ދެމެދުގައި ތާށިވެފައި ހުންނަން ބޭނުންފުޅު ނުވާކަމަށް ސްރީލަންކާގެ ރައީސް، އަނޫރާ ކުމާރާ ޑިސަނަޔަކަ ވިދާޅުވެއްޖެއެވެ.

މިދިޔަ އާދިއްތަ ދުވަހު ބޭއްވި ރިޔާސީ އިންތިޚާބުން ކާމިޔާބު ހޯއްދަވައި، ރައީސްކަމުގެ މަގާމަށް ވަޑައިގެންނެވި ޑިސަނަޔަކަ، މިހެން ވިދާޅުވީ ބޭރުގެ "މޮނޮކޮލް" މަޖައްލާއަށް ދެއްވި އިންޓަވިއުގައި އެވެ. އެ އިންޓަވިއުގައި ޑިސަނަޔަކަ ވިދާޅުވީ، ޖިއޯ ޕޮލިޓިކްސްގައި އަދި ދުނިޔޭގައި ބާރުގަދަ ވުމަށް ގައުމުތަކުން ކުރާ މަސައްކަތުގައި ސްރީލަންކާއިން ބައިވެރިވާން ބޭނުންފުޅުނުވާ ކަމަށާއި އެފަދަ މަސައްކަތްތައް ކުރާ ގައުމުތަކުގެ އެ މަސައްކަތްތަކުގައި ތާއީދު ކުރަން ވެސް ބޭނުންފުޅުނުވާ ކަމަށެވެ.

އިންޑިޔާއާއި ޗައިނާގެ ވާހަކަ ދައްކަވަމުން ޑިސަނަޔަކަ ވިދާޅުވީ އެ ދެ ގައުމު ވެސް ދެކެނީ ހަމަހަމަ ރަހްމަތްތެރިންތަކެއް ގޮތުގައި ކަމަށާއި، ބޭނުންފުޅުވަނީ ދެ ގައުމާ މެދު ވެސް އޮންނަ ގުޅުން ބަދަހިކުރަން ކަމަށެވެ.

ގައުމުތަކުން ބާރުގަދަވުމުގެ ރޭހުގައި [ސްރީލަންކާއިން] ބައިވެރިނުވާނެ، އަދި ރޭހުގައި ބައިވެރިވާ އެއްވެސް ގައުމަކަށް ތާއީދު ވެސް ނުކުރާނަން. ދެ ގައުމު [އިންޑިއާ-ޗައިނާ] އަކީ ގާތް ރަހުމަތްތެރިން، އުންމީދު ކުރަނީ ކުރިއަށް އޮތް ތަނުގައި ދެ ގައުމާ މެދު ވެސް އޮންނަ ގުޅުން ރަނގަޅުވާނެ ކަމަށް - ސްރީލަންކާގެ ރައީސް، އަނޫރާ ކުމާރާ ޑިސަނަޔަކަ

މީގެ އިތުރުން ޔޫރަޕިއަން ޔޫނިއަންއާއި މެދުއިރުމައްޗާއި އެފްރިކާއާ ވެސް ރަނގަޅު ގުޅުމެއް ބާއްވާނެ ކަމަށާއި، ނަމަވެސް މިވަގުތުގެ ފޯކަސް ގެންގުޅެނީ އިގްތިސާދީ ގޮތުން ގައުމު ހަމަމަގަށް އެޅުވުމަށް ކަމަށް ޑިސަނަޔަކަ ވިދާޅުވިއެވެ.

ޑިސަނަޔަކަ އަކީ ލަންކާގެ ވާތު ފިޔައިގެ ޕާޓީއެއް ކަމަށްވާ، ޖަނާތާ ވިމުކްތީ ޕެރަމޫނާ ޕާޓީ (ޖޭވީޕީ) ގެ ލީޑަރެވެ. އޭނާ ރައީސް ކަމުގެ ހުވާކުރެއްވީ މިދިޔަ ހޯމަ ދުވަހުއެވެ.

ޑިސަނަޔަކަ ރިޔާސީ އިންތހާބު ކާމިޔާބު ކުރެއްވީ ޕްރިފެރެންޝަލް ވޯޓުތަކާއެކު ޖުމުލަ 5.74 މިލިއަން ވޯޓު ހޯއްދަވައިގެންނެވެ. އޭނާއާ އެންމެ ގާތުން ވާދަ ކުރެއްވި ސަޖިތު ޕްރެމަދާސާއަށް ލިބިވަޑައިގެންނެވީ 4.5 މިލިއަން ވޯޓެވެ.