ހަމްސްޓްރިންގް އަނިޔާއިން އަރައިގަތުމަށްފަހު އެނބުރި އައި މެސީ ކުޅުނު ފުރަތަމަ މެޗުގައި ޖެހި ދެ ލަނޑާއެކު އިންޓަރ މަޔާމީން އޯލަންޑޯ ސިޓީ ފަހަތުން އަރައި 3-1 އިން ބަލިކޮށް ލީގްސް ކަޕްގެ ފައިނަލުގެ ޖާގައެއް ކަށަވަރުކޮށްފިއެވެ.

މިއަދުގައި ކުޅުނު މެޗުގައި ފުރަތަމަ ހާފުގެ ނިމުމާ ކައިރިވެފައި ވަނިކޮށް މާކޯ ޕަސަލިޗްގެ ލަނޑުން އޯލަންޑޯ ސިޓީ ވަނީ ފުރަތަމަ ހާފުގައި ލީޑުނަގާފައެވެ.

Ad by Hajj Corporation

މަޔާމީ އިން މެޗު އެއްވަރުކުރީ މެޗުގެ 77 ވަނަ މިނެޓުގައި ޓަޑެއޯ އަލެންޑޭ ޕެނަލްޓީ އޭރިއާ ތެރޭގައި ވައްޓާލުމުން ލިބުނު ޕެނަލްޓީ ކިކުން މެސީ ޖެހި ގޯލަކުންނެވެ. މިފައުލާއެކު އޯލަންޑޯގެ ކުޅުންތެރިއަކަށްވަނީ ރަތްކާޑުދައްކައި ދަނޑުން ފޮނުވާލާފައެވެ. އޭގެ ފަހުން 88 ވަނަ މިނެޓުގައި ޖޯޑީ އަލްބާގެ އެސިސްޓަކުން މެސީ ވަނީ ދެވަނަ ގޯލުޖަހާފައެވެ. މީގެއިތުރުން މެޗުގެ އިތުރުވަގުތުގައި ޓެލާސްކޯ ސެގޯވިއާ ވަނީ އިތުރު ގޯލެއް ޖަހައި ނަތީޖާ 3-1 އަށް ބަދަލުކޮށްދީފައެވެ.

ވާދަވެރި މެޗެއްގެ ގޮތުގައިފެނިގެންދިޔަ ދިޔަ މި މެޗުގައި 9 ރީނދޫ ކާޑާއި އެއް ރަތް ކާޑު ދައްކާފައިވެއެވެ.

މި މުބާރާތުގެ ފައިނަލްގައި އިންޓަރ މަޔާމީން ކުޅޭނީ އެލްއޭ ގެލެކްސީ އާއި ސިއެޓަލް ސައުންޑާސް އާ ދެމެދު ކުޅޭ މެޗުން މޮޅުވާ ޓީމަކާ ދެކޮޅަށެވެ. ފައިނަލް މެޗު ކުޅޭނީ އާދީއްތަ ދުވަހުއެވެ. ފާއިތުވި އަހަރުގެ ލީގްސް ކަޕްވެސް ކާމިޔާބުކޮށްފައިވަނީ އިންޓަރ މަޔާމީންނެވެ.