މެންޗެސްޓާ ޔުނައިޓެޑްގެ ބްރެޒިލް މިޑްފީލްޑަރު ކަސެމީރޯ ހޯދުމަށް ދުނިޔޭގެ އެންމެ މޮޅު ދެ ކުޅުންތެރިން ކަމަށްވާ ކްރިސްޓިއާނޯ ރޮނާލްޑޯ އާއި ލިއޮނަލް މެސީގެ މެދުގައި ބޮޑު ވާދަވެރިކަމެއް އުފެދިއްޖެއެވެ. މާކާ ނޫހުން ރިޕޯޓްކޮށްފައިވާ ގޮތުގައި، ރޮނާލްޑޯ އަންނަނީ އޭނާގެ ކުރީގެ ރެއާލް މެޑްރިޑް ޓީމްމޭޓް ސައުދީ އަރަބިއްޔާއަށް ގެންދިއުމަށް އަމިއްލައަށް މަސައްކަތް ކުރަމުންނެވެ. ހަމައެއާއެކު، މެސީ ކުޅެމުންދާ އިންޓަ މިއާމީން ވެސް އަންނަނީ ކަސެމީރޯ ހޯދުމަށް މަސައްކަތް ކުރަމުންނެވެ.

ރޮނާލްޑޯ ވަނީ ކަސެމީރޯއާ ގުޅައި، ރެއާލް މެޑްރިޑުގައި އެކުގައި ހޭދަކުރި ކާމިޔާބު ދުވަސްތަކުގެ ހަނދާންތައް އާކޮށް، ސައުދީ ލީގަށް ބަދަލުވުމަށް އޭނާއަށް ބާރުއަޅާފައެވެ. ރޮނާލްޑޯ ގަބޫލުކުރާ ގޮތުގައި 34 އަހަރުގެ ކަސެމީރޯއަކީ އޭނާގެ ކްލަބުގެ މިޑްފީލްޑް ވަރުގަދަކުރުމަށް މިވަގުތު އެންމެ މުހިންމު ކުޅުންތެރިޔާއެވެ.

Ad by Hajj Corporation

ނަމަވެސް، ކަސެމީރޯ މީގެ ކުރިން ބުނެފައިވަނީ އޭނާ ބޭނުންވަނީ ޔޫރަޕްގައި މަޑުކުރަން ނުވަތަ އެމެރިކާގެ އެމްއެލްއެސް ލީގަށް ބަދަލުވާން ކަމަށެވެ. ސައުދީއަށް ބަދަލުވުމަކީ އޭނާގެ އެންމެ ފަހުގެ ނިންމުމަށް ވުން އެކަށީގެންވީ ނަމަވެސް، އޭނާގެ އިސްކަން މިވަގުތު އޮތީ އެހެން ދިމާލަކަށެވެ.

އިންޓަ މިއާމީގެ ޝައުގުވެރިކަން ބޮޑު

ޑޭވިޑް ބެކަމްގެ އިންޓަ މިއާމީން ކަސެމީރޯ ހޯދުމަށް ކުރާ މަސައްކަތް މިހާރު ވަނީ ވަރަށް ބޮޑަށް ކުރިއަށް ގޮސްފައެވެ. އެ ކްލަބުން ކަސެމީރޯ ދެކެނީ ސާޖިއޯ ބުސްކެޓްސްގެ ބަދަލުގައި މިޑްފީލްޑަށް ގެނެވޭނެ އެންމެ ރަނގަޅު ކުޅުންތެރިޔާގެ ގޮތުގައެވެ. ބްރެޒިލްގެ ބައެއް ރިޕޯޓްތައް ބުނާގޮތުގައި ކަސެމީރޯ ދާދި ފަހުން މިއާމީއަށް ޒިޔާރަތްކޮށް، ކްލަބުގެ ވަސީލަތްތައް ބަލައި، ބޯޑު މެންބަރުންނާ ބައްދަލުކޮށްފައިވެއެވެ.

މި ޓްރާންސްފާ ކާމިޔާބުވެއްޖެނަމަ، ރެއާލް މެޑްރިޑްގެ ލެޖެންޑެއް ކަމަށްވާ ކަސެމީރޯ، ބާސެލޯނާގެ ކުރީގެ ތަރި ލިއޮނަލް މެސީއާއެކު އެއް ޓީމަކުން ފެނިގެންދާނެއެވެ. މިއީ ފުޓްބޯޅަ ދުނިޔެއަށް ފެނިގެންދާނެ އާދަޔާ ހިލާފު މަންޒަރަކަށް ވާނެއެވެ.

މި ސީޒަނުގައި ޕްރިމިއާ ލީގުގައި 29 މެޗު ކުޅެފައިވާ ކަސެމީރޯ ވަނީ އަންނަ ޖޫން މަހަށްފަހު އޭނާގެ ކޮންޓްރެކްޓް އާނުކުރާނެ ކަމަށް ޖެނުއަރީ މަހު ކަށަވަރުކޮށްދީފައެވެ. މިއާއެކު އޯލްޑް ޓްރެފޯޑުގައި އޭނާ ހޭދަކުރި ހަތަރު އަހަރުގެ ދުވަސްވަރު ނިމުމަކަށް އަންނާނެއެވެ.