މޭޖަރ ލީގު ސޮކަރ (އެމްއެލްއެސް) ރެގިއުލަރ ސީޒަނުގައި ކޮލަމްބަސް ކްރޫ އަތުން 2-1 އިން އިންޓަރ މިއާމީ ބަލިވެއްޖެއެވެ. ރޭ ކުޅުނު މި މެޗުގައި ކޮލަމްބަސް ކްރޫ މޮޅުވީ މެޗުގެ ފަހުކޮޅު ޖެހި ލަނޑުންނެވެ. މި މެޗުގައި ލިއޮނެލް މެސީ ހިތްގައިމު ހިލޭޖެހުމަކުން ލަނޑެއް ކާމިޔާބުކުރި ނަމަވެސް، ޓީމު ބަލިވުމުން ސަލާމަތެއް ނުކުރެވުނެވެ.

އެމްއެލްއެސް ރެގިއުލަރ ސީޒަނުގައި އެންމެ ފަހުން ކުޅުނު 10 މެޗުގެ ތެރެއިން އިންޓަރ މިއާމީއަށް މޮޅުވެވިފައިވަނީ އެންމެ މެޗަކުންނެވެ. އަނެއް 9 މެޗުގެ ތެރެއިން ހަ މެޗު އެއްވަރުވިއިރު، ތިން މެޗުން ވަނީ ބަލިވެފައެވެ. އެ ޓީމަށް މޮޅުވެވުނު ހަމައެކަނި މެޗަކީ ސީއެފް މޮންޓްރިއާލް އަތުން 7-1 އިން މޮޅުވި މެޗެވެ. އެ މެޗުގައި މެސީ ވަނީ ހަތަރު ލަނޑު ޖަހައި، އެއް ލަނޑު ޖެހުމަށް އެހީތެރިވެދީފައެވެ.

Ad by Hajj Corporation

ފަހަކަށް އައިސް ޓީމުގެ ނަތީޖާތައް ދަށްވި ނަމަވެސް، އުމުރުން 37 އަހަރުގެ މެސީ ދަނީ މޮޅު ކުޅުމެއް ދައްކަމުންނެވެ. އެގޮތުން ފާއިތުވި 10 މެޗުގައި މެސީ ވަނީ 9 ލަނޑު ޖަހައި، 4 އެސިސްޓް ހަދައި، ޖުމްލަ 13 ލަނޑުގައި ސީދާ ގޮތުން ބައިވެރިވެފައެވެ. އަދި އޭނާ މިހާރުވެސް އޮތީ އެންމެ ގިނަ ލަނޑު ޖެހި އަދި އެންމެ ގިނަ އެސިސްޓް ހެދި ކުޅުންތެރިންގެ ލިސްޓުގެ ކުރީގައެވެ.

ކޮލަމްބަސް ކްރޫ އަތުން ބަލިވި ނަމަވެސް، އިންޓަރ މިއާމީ އަދިވެސް އޮތީ އެމެރިކާ ލީގުގެ އީސްޓަން ކޮންފަރެންސްގެ ތިންވަނަ މަގާމުގައެވެ.