އެމެރިކާގެ މޭޖާ ލީގު ސޮކާ (އެމްއެލްއެސް) ގައި ލިއޮނަލް މެސީ ލަނޑެއް ޖަހައިދީފައި ވަނިކޮށް ވެސް، އިންޓަ މިއާމީގެ އަމިއްލަ ދަނޑުގައި ޓޮރޮންޓޯ އަތުން 2-1 އިން ބަލިވެ، މޮޅެއް ނުލިބި ޖެހިޖެހިގެން ފަސް މެޗު ނިންމާލަން އެ ޓީމަށް ޖެހިއްޖެ އެވެ.

ހޮނިހިރު ދުވަހު ކުޅުނު މި މެޗުގައި ޓޮރޮންޓޯ އިން ވަނީ ދެވަނަ ހާފުގައި އަވަސް އަވަހަށް ދެ ލަނޑު ޖަހައި ލީޑު ނަގާފަ އެވެ. އެގޮތުން މެޗުގެ 59 ވަނަ މިނެޓުގައި ޖޯޝް ސާޖަންޓް ފުރަތަމަ ލަނޑު ޖަހައިދިން އިރު، އޭގެ ތިން މިނެޓު ފަހުން، 62 ވަނަ މިނެޓުގައި ޑެރިކް އެޓިއެން ޖޫނިއާ ވަނީ އެ ޓީމުގެ ދެވަނަ ލަނޑު ކާމިޔާބުކޮށްދީފަ އެވެ. އޭގެ ފަހުން މެޗުގެ 82 ވަނަ މިނެޓުގައި އާޖެންޓީނާގެ ރޮޑްރީގޯ ޑި ޕައުލް ތަނަވަސްކޮށްދިން މޮޅު ފުރުސަތަކުން މެސީ ވަނީ މިއާމީ އަށް ލަނޑެއް ޖަހައިދީ އުންމީދު އާކޮށްދީފަ އެވެ. ނަމަވެސް މެޗު އެއްވަރުކުރުމަށް މިއާމީން ކުރި މަސައްކަތް ކާމިޔާބުވާ ގޮތެއް ނުވި އެވެ.

Ad by Hajj Corporation

މި ލަނޑާއެކު މެސީ ވަނީ މި ސީޒަނުގައި 14 ލަނޑު ހަމަކޮށް، އެމްއެލްއެސްގެ އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ދެވަނައިގަ އެވެ. މި ލިސްޓުގެ އެއްވަނައިގައި 16 ލަނޑާއެކު އޮތީ ޑެލަސްގެ ޕީޓާ މޫސާ އެވެ. މިއާމީން އެންމެ ފަހުން ކުޅުނު ފަސް މެޗުގެ ތެރެއިން ހަތަރު މެޗުން ބަލިވެ އެއް މެޗު އެއްވަރުވެފައިވާއިރު، މީގެ ތެރޭގައި ލީގްސް ކަޕްގެ ގްރޫޕް ސްޓޭޖުން އެ ޓީމު ކެޓި މެޗުތައް ވެސް ހިމެނެ އެވެ.

މި ނަތީޖާއާއެކު ވެސް މިއާމީ އޮތީ އީސްޓަން ކޮންފަރެންސްގެ ދެވަނައިގަ އެވެ. އެހެން ނަމަވެސް، އެއްވަނައިގައި އޮތް ނެޝްވިލް އަށް ވުރެ އެއް މެޗު އިތުރަށް ކުޅެގެން މިއާމީ އޮތީ ހަތް ޕޮއިންޓް ފަހަތުގަ އެވެ. އަދި ރޮބަޓް ލެވަންޑޯސްކީގެ ޝިކާގޯ ފަޔާ ވަނީ ނިއު ޔޯކް ރެޑް ބުލްސްއާ 1-1 އިން އެއްވަރުކޮށް، ތާވަލުގައި މިއާމީއާ ތިން ޕޮއިންޓަށް ގާތްކޮށްފަ އެވެ.

މީގެ އިތުރުން، އެތުލެޓިކޯ މެޑްރިޑުން ދާދި ފަހުން އޯލެންޑޯ ސިޓީއާ ގުޅުނު ފްރާންސްގެ ތަރި އެންޓޮއިން ގްރީޒްމަން ދެވަނަ ހާފުގައި ޖެހި ދެ ލަނޑާއެކު، އެ ޓީމުން ވަނީ 2-1 އިން ރިއަލް ސޯލްޓް ލޭކް ބަލިކޮށް، އީސްޓަން ކޮންފަރެންސްގެ ޕްލޭއޮފް ޖާގައަކަށް ކުރިއަށް ޖެހިލާފަ އެވެ.