ރާއްޖޭގެ ރިސޯޓެއްގައި ނިޔާވި ދިވެހި ޒުވާނެއްގެ ހަށިގަނޑު އޮޓޮޕްސީ ހަދަން ނިންމައިފިއެވެ.

ދިވެހި ފުލުހުންގެ ޚިދުމަތުން ބުނީ، ބ. އަތޮޅުގައި ހިންގާ ރިސޯޓެއްގައި 21 އަހަރުގެ ދިވެހި ފިރިހެނަކު ނިޔާވެފައިވާ މައްސަލައެއް މި މަހުގެ 23 ވަނަ ދުވަހު ފުލުހުންނަށް ރިޕޯޓުކޮށްފައިވާ ކަމަށެވެ.

Ad by Hajj Corporation

މައުލޫމާތު ލިބިފައިވާ ގޮތުގައި މި މައްސަލަ ފެންމަތިވެފައި ވަނީ، ބ. އަތޮޅު ނޮޓިލަސް ރިސޯޓުގައެވެ.

މި މައްސަލައިގައި އިތުރަށް ބަލަންޖެހޭ ކަންތައްތައް ބަލައި، މަރުވި ސަބަބު ދެނެގަތުމަށްޓަކައި އޮޓޮޕްސީ ހެދުމަށް، މި މައްސަލަ ތަހުގީގުކުރާ ޓީމުން ނިންމާފައިވާކަމަށް ވެސް ފުލުހުން ބުނެފައިވެއެވެ.

މަރުވި ޒުވާނާގެ އޮޓޮޕްސީ ހަދަން އިންޑިއާއަށް ފޮނުވަން ނިންމާފައި ވަނީ ސެޕްޓެމްބަރު 2، ގަ އެވެ. އޭނާގެ ހަށިގަނޑު އޮޓޮޕްސީއަށްފަހު އަނބުރާ ރާއްޖެ ގެނައުމަށް ނިންމާފައި ވަނީ ސެޕްޓެމްބަރު 7 ގަ އެވެ.

އަދި މި މައްސަލަ އިތުރަށް ތަހުގީގުކުރަމުންދާކަމަށް ވެސް، މީޑިއާތަކަށް ފޮނުވި މެސެޖުގައި ފުލުހުންގެ މީޑިއާ އޮފިސަރު ވިދާޅުވެފައިވެއެވެ.

ރާއްޖޭގެ ރިސޯޓުތަކުގައި މީގެކުރިން ވެސް މިފަދަ މަރުގެ މައްސަލަތައް ހިނގާފައިވާއިރު، އެ މަރުތަކުގެ ސަބަބު ދެނެގަތުމަށްޓަކައި އޮޓޮޕްސީ ހަދާފައިވެއެވެ.