ސަހުޔޫނީން ޔަމަނުގެ ސަންއާއަާް ދިން ހަމަލާއެއްގައި އެ ގައުމުގެ ހޫތީ ސަރުކާރުގެ ބޮޑުވަޒީރާއި ބައެއް ވަޒީރުން ޝަހީދުވި ހާދިސާގެ ބަދަލު ފުރިހަމައަށް ހިފާނެކަމުގެ އިންޒާރު ހޫތީން ދީފިއެވެ.

ޔަމަނުގެ ހޫތީ ސަރުކާރުގެ ބޮޑުވަޒީރު އަހުމަދު އަލް-ރަހަވީއާއި ސަރުކާރުގެ ވަޒީރުންތަކެއް ޝަހީދުކޮށްލާފައިވަނީ ބައްދަލުވުމެއްގައި ތިއްބަވަނިކޮށެވެ. މި ހަމަލާގައި ޝަހީދުވި މީހުންގެ ޖުމްލަ އަދަދެއް ހޫތީން ހާމަކޮށްފައެއްނުވެއެވެ. ނަމަވެސް ބައެއް މަސްދަރުތަކުން ބުނާ ގޮތުގައި 12 ވަޒީރަކު ވަނީ ހަމަލާތަކުގައި ޝަހީދުވެފައެވެ.

Ad by Hajj Corporation

ޔަހޫދީން ޣައްޒާގައި ހަމަލާތައް ފެށިފަހުން ރަތް ކަނޑުން ދަތުރު ކުރާ އިސްރާއީލަށް މުދާ އުފުލާ ބޯޓުފަހަރަށް އަމާޒުކޮށް ހޫތީން އަންނަނީ ހަމަލާތައް ދެމުންނެވެ. ޔަމަނުގެ ބޮޑު ބައެއްގެ މައްޗަށް ވެރިކަން ކުރާ އެ ޖަމާއަތުން ބުނެފައި ވަނީ އިސްރާއީލުން ޣައްޒާއަށް ދޭ ހަމަލާތައް ހުއްޓާލައި އެކަށީގެންވާ އެހީ ޣައްޒާގެ ރައްޔިތުންނަށް ފޯރުކޮށްދިނުމުން ނޫނީ، އިސްރާއީލާ ގުޅުން އޮންނަ އުޅަނދުފަހަރަށް ރަތް ކަނޑު އަމާން ނުވާނެ ކަމަށެވެ.

މި ހަމަލާތަކުގައި 4 އާގުބޯޓެއް ފައްތާލާފައިވާއިރު ހަމަލާތަކުގެ ސަބަބުން ބައިނަލްއަގްވާމީ ވިޔަފާރިއަށް ބުރޫއަރައި ވިޔަފާރި ދަތުރުކުރާ މަގުތައްވެސް ބަދަލުކުރިއެވެ.

ހޫތީން ބުނަމުން އަންނަނީ ޔަހޫދީން ކިތަންމެ ގިނަ ހަމަލާތަކެއްދިން ނަމަވެސް ފަލަސްތީނުގެ ރައްޔިތުންގެ ހައްގުގައި ދެމުން އަންނަ ހަމަލާތައް ހުއްޓާނުލާނެކަމަށެވެ.

އަދި މި ހަމަލާގެ ސަބަބުން ބޮޑުވަޒީރާއި އިތުރު ވަޒީރުތަކެއް ޝަހީދުވިނަމަވެސް ސަރުކާރުގެ ޒިންމާތައް އަދާނުކުރެވޭނެ ހާލަތެއް ނެތްކަމަށް ހޫތީން ވަނީ ބުނެފައެވެ.

ޔަމަނުގެ ރައީސް މަހްދީ އަލް މަަޝާޠު ވަނީ ބޮޑުވަޒީރުގެ ނައިބު މުޙައްމަދު އަޙްމަދު މުފްތާހަށް ބޮޑުވަޒީރުގެ ޒިންމާތައް ހަވާލުކުރުމަށް މިހާރު އަންގަވާފައެވެ.