ޕެރިސް ސެއިންޓް ޖަރމޭން (ޕީއެސްޖީ) ގެ ތަރި ކުޅުންތެރިން ކަމަށްވާ ޑެސިރޭ ޑޫއޭ އަދި އުސްމާން ޑެމްބެލޭ ފްރާންސް ގައުމީ ޓީމުގައި ކުޅެނިކޮށް އަނިޔާވުމާ ގުޅިގެން، ކްލަބުގެ މެނޭޖްމަންޓުން ހތްހަމަ ނުޖެހުން ފާޅުކޮށް ސިޓީއެއް ފޮނުވައިފިއެވެ. މި ސިޓީގައި ފްރާންސްގެ ގައުމީ ޓީމާ ޕީއެސްޖީ އާދެމެދު ގުޅުން ރަނގަޅުކުރުމަށް އެދިފައިވެއެވެ.

މި ދެ ކުޅުންތެރިންނަށް އަނިޔާވީ ހުކުރު ދުވަހު ކުޅުނު ވޯލްޑް ކަޕް ކޮލިފައިންގ މެޗުގައި ޔުކްރެއިނާ އާ ދެކޮޅަށް ކުޅެނިކޮށެވެ. ޕީއެސްޖީ އަށް ފުރަތަމަ ޗެމްޕިއަންސް ލީގް ކާމިޔާބުކޮށްދިނުމުގައި މުހިންމު ދައުރެއް އަދާކޮށް، ބެލަންޑީއޯ ކާމިޔާބުކުރުމުގެ ފުރުސަތު ބޮޑު ޑެމްބެލޭ އަށް 6 ހަފްތާ ކުޅުމާއި ދުރުގައި ހުންނަންޖެހޭއިރު، ޑޫއޭ އަނިޔާ އާއި ގުޅިގެން 4 ހަފްތާއަށް ކުޅުމާއި ދުރުގައި ހުންނަންޖެހޭނެއެވެ.

Ad by Hajj Corporation

މި އަނިޔާ އާއި ގުޅިގެން ޕީއެސްޖީއަށް މިވަނީ ފޫނުބެއްދޭވަރުގެ ގެއްލުމަކާއި ކުރިމަތިލާން ޖެހިފައެވެ. އެގޮތުން ސެޕްޓެމްބަރ 17 ގައި އެޓަލާންޓާ އާ ދެކޮޅަށް ކުޅޭ ޗެމްޕިއަންސް ލީގް މެޗާއި އޮކްޓޯބަރ 1 ގައި ބާސެލޯނާ އާ ދެކޮޅަށް ކުޅޭ މެޗުގައި މި ދެ ކުޅުންތެރިންނަށް ނުކުޅެވޭނެއެވެ.