ޕީއެސްޖީގެ ފޯވާޑް އުސްމާން ޑެމްބެލޭ 2025 ވަނަ އަހަރުގެ އެންމެ މޮޅު ފީފާ ފިރިހެން ކުޅުންތެރިޔާގެ މަގާމު ހޯދައިފިއެވެ. މި އެވޯޑު އޭނާއަށް ލިބުނީ ރޭގައި ދުވަހު ބޭއްވި ރަސްމިއްޔާތެއްގައެވެ. މި މަގާމަށް ވާދަކުރި ޒުވާން ކުޅުންތެރިޔާ ލަމީން ޔަމާލް އާއި ރެއާލް މެޑްރިޑްގެ ފޯވާޑް ކީލިއަން އެމްބާޕޭ އަށްވުރެ ކުރި ހޯދައި ޑެމްބެލޭ މި އެވޯޑު ހޯދިއިރު، މީގެ ކުރިން ޑެމްބެލޭ ވަނީ މި ސީޒަންގެ ބެލޮންޑޯ ވެސް ހޯދާފައެވެ. މި ކާމިޔާބީއާއެކު، އޭނާ ވަނީ މި އަހަރުގެ އެންމެ ފާހަގަކޮށްލެވޭ ފުޓްބޯޅަ ކުޅުންތެރިޔާގެ މަގާމު ހޯދާފައެވެ.

ޑެމްބެލޭ މި އެވޯޑު ހޯދުމަށް މެދުވެރިވި އެންމެ މުހިންމު ސަބަބަކީ ޕެރިސް ސެއިންޓް ޖާމަން (ޕީއެސްޖީ) އަށް ތާރީޚީ ގޮތެއްގައި ފުރަތަމަ ފަހަރަށް ޔޫއެފާ ޗެމްޕިއަންސް ލީގު ކާމިޔާބުކޮށްދިނުމުގައި އޭނާ އަދާކުރި މައިގަނޑު ދައުރެވެ. އަހަރުތަކެއް ވަންދެން ވިންގްގައި ކުޅުމަށްފަހު، މި ސީޒަންގައި އޭނާ ވަނީ ގޯލު ޖަހާ މައި ސްޓްރައިކަރަކަށް ބަދަލުވެފައެވެ. އޭނާގެ މި ޓެކްޓިކަލް ބަދަލާއި މުހިންމު މެޗުތަކުގައި އޭނާ ދެއްކި ހުނަރުވެރިކަމާއި ކޮންސިސްޓެންސީއަކީ މުޅި ދުނިޔޭގެ ގައުމީ ޓީމުތަކުގެ ކެޕްޓަނުންނާއި ކޯޗުންނާއި ނޫސްވެރިންނާއި ސަޕޯޓަރުންގެ ވޯޓު ހޯދުމަށް އެހީވި މައިގަނޑު ކަންތައްތަކެވެ.

Ad by Hajj Corporation

ފީފާގެ އެންމެ މޮޅު 11 ކުޅުންތެރިންގެ ލިސްޓު (FIFA Men’s Team of the Year) ގައި ޑެމްބެލޭ އާއި ޔަމާލް ހިމެނުނު ނަމަވެސް، އެމްބާޕޭ އަށް މި ލިސްޓުން ޖާގަ ގެއްލުނެވެ. މި ލިސްޓުގައި ޕީއެސްޖީގެ ގިނަ ކުޅުންތެރިން ހިމެނިފައިވެއެވެ. އެގޮތުން އެންމެ މޮޅު ގޯލްކީޕަރުގެ އެވޯޑު ހޯދި ޖިއާންލުއިގީ ޑޮނަރޫމާ އާއި ޑިފެންޑަރުންގެ ތެރެއިން އަޝްރަފް ހަކީމީ އަދި ނޫނޯ މެންޑޭސް ހިމެނެއެވެ. ޑިފެންސްގެ ބާކީ ދެ ޖާގަ ވިލިއަން ޕާޗޯ އާއި ވާޖިލް ވެން ޑައިކް ހޯދިއިރު، މިޑްފީލްޑްގައި ޖޫޑް ބެލިންގހަމް، ކޯލް ޕާމާ، ވިޓީނިއާ އަދި ޕެޑްރީ ހިމެނުނެވެ.

އަންހެން ކުޅުންތެރިންގެ ބައިގައި، އައިތާނާ ބޮންމަތީ ވަނީ ތިންވަނަ އަހަރަށް ވިދިވިދިގެން އެންމެ މޮޅު ފީފާ އަންހެން ކުޅުންތެރިޔާގެ މަގާމު ހޯދައި، އޭނާގެ ޑޮމިނެންސް ދަމަހައްޓާފައެވެ. ކޯޗުންގެ ބައިން އެންމެ މޮޅު ފިރިހެން ކޯޗުގެ އެވޯޑު ލުއިސް އެންރިކޭ ހޯދިއިރު، އަންހެން ކޯޗުންގެ އެވޯޑު ހޯދީ ސަރީނާ ވީގްމަން އެވެ. މީގެ އިތުރުން އެންމެ ރީތި ގޯލަށް ދޭ ޕުސްކާސް އެވޯޑު ސަންތިއާގޯ މޮންޓިއޭލް ހޯދިއިރު، ފީފާ މާޓާ އެވޯޑު ލިޒްބެތު އޮވާލޭ އަށް ލިބުނެވެ.