ރައީސް އަބްދުﷲ ޔާމީންގެ އެންމެ އަރިސް ދެ ބޭފުޅުންގެ ގޮތުގައި ތިއްބަވާ ޑރ. މުޙައްމަދު ޖަމީލް އަޙްމަދާއި މުޙައްމަދު މަލީޙް ޖަމާލް އަށް. ކޮންމެ މަހަކު ބޮޑު މުސާރައެއް ރައީސް ޔާމީން ދެއްވަނީ، ރައްޔިތުންގެ ފައިސާއިން އެމަނިކުފާނު ވަގަށްނަގާފައިވާ ފައިސާއިންކަމަށް ރައްޔިތުންގެ އިނގުރައިދޫ ދާއިރާގެ މެމްބަރު އަދި ޕީއެންސީގެ ޕާލިމެންޓަރީ ގުރޫޕުގެ ލީޑަރު އިބްރާޙީމް ފަލާޙް ވިދާޅުވެއްޖެއެވެ.

ފަލާޙް އެކްސްގައި ކުރެއްވި ޕޯސްޓެއްގައި ވިދާޅުވީ، ޕީއެންސީއާ ގުޅިވަޑައިގަތުމަށް، "ޖަމީލުވެސް، މަލީހުވެސް، ޑީލް ހުށަހެޅި" ކަމަށާއި، އެހެންނަމަވެސް އެ ދެ ބޭފުޅުން ވެސް އެ ޕާޓީއާ ގުޅުމުގެ ފުރުސަތު ދިނުމަށް އެ ޕާޓީގެ ލީޑާޝިޕުން ނުރުހޭ ކަމަށެވެ.

އަދި ސިޔާސީ ގޮތުން ރައްޔިތުންގެ ތާއީދެއް ނެތް ދެ ބޭފުޅަކު ޕީއެންސީއާ ގުޅުމުގެ ފުރުސަތު ދިނުމުގެ ބޭނުމެއް ނެތްކަމަށް ވެސް ފަލާޙް ވިދާޅުވިއެވެ.

ފަލާޙް އިތުރަށް ވިދާޅުވީ، ކޮށްމެމަހަކު ޖަމީލާއި މަލީހަށް، މީހަކަށް 75،000 ރުފިޔާގެ މުސާރައެއް ރައީސް ޔާމީނު ދެއްވަނީ ރައްޔިތުންގެ ބައިތުލްމާލުން ކަމަށެވެ. އެއީ ރައީސް ޔާމީނު ވަގަށްނަގާފައިވާ އެތައްސަތޭކަ މިލިއަންރުފިޔާގެ ތެރެއިން ދޭ ފައިސާއެއްކަމަށް ފަލާޙް ތުހުމަތުކުރެއްވިއެވެ.

ރައީސް ޔާމީންގެ ގެކޮޅުގައި ސިލްސިލާ ގޮތެއްގައި ބާއްވާ ޖަލްސާތަކަށް އިޝާރާތްކުރައްވައި ފަލާހް ވިދާޅުވީ، "ސިޓިންގރޫމްގައި ޖަހާ ސަކަރާތް ބަޔަކަށް ނޭނގުނަސް އެކަން އޭނާއަށް އެނގިވަޑައިގަންނަވާ ކަމަށެވެ.

ވަގަށްނަގާފައިވާ ފައިސާތަކުގެ ވާހަކަ އޮއްބާލާ މަޢުސޫމް ކުށެއްނެތް ބައެއްގެ ބޮލަށް ހުރިހާކަމެއް ޖަހަން ރައީސް ޔާމީން އުޅުއްވާކަމަށް ވެސް ފަލާހްގެ ޕޯސްޓުގައި ވިދާޅުވެފައިވެއެވެ.ނަމަވެސް "ތަފާތު ގޮތަކަށް ގޭމުކުޅެގެން" ކޮށްފައިހުރި ނުބައި ކަންތައްތައް އޮއްބާލަން ކުރާ ޕްލޭންތައް ފެއިލްވާނެކަން ކަށަވަރުވާކަމަށް ވެސް ފަލާހް ވިދާޅުވެފައިވެއެވެ.

ފަލާހްގެ ފާޑުކިޔުމާއި ބަހުގެ ހަމަލާތަކެއް ރައީސް ޔާމީނާއި މަލީހާއި ޖަމީލަށް އަމާޒުކުރައްވާފައިވާއިރު، އެ ތިން ބޭފުޅުން ވެސް ގެންދަވަނީ ޕީއެންއެފް އިން ބާއްވަމުން ގެންދާ ޖަލްސާތަކުގައި، ސަރުކާރުގެ އިސް ބޭފުޅުންނަށާއި ރައީސުލްޖުމްހޫރިއްޔާއަށް އަދި ޕީއެންސީގެ މަޖިލިސް މެމްބަރުންނަށް އެކިކަހަލަ ތުހުމަތުތައް ކޮށް، ހަޖޫޖަހައި، އެކިއެކި ވާހަކަދައްކަވަމުންނެވެ.