ފ.ފީއަލީ ވޮލީ ކޯޓު ހުޅުވުން މިވަގުތައް މަޑުޖައްސާލަން ލޯކަލް ގަވަރމެންޓް އޮތޯރިޓީ- އެލްޖީއޭއިން އަންގާފައިވަނިކޮށް އެލްޖީއޭގެ އެންގުން ބޮލާލައި ޖެހުމަށްފަހު ވޮލީ ކޯޓު ހުޅުވައިފިއެވެ.

ފީއަލީ ކައުންސިލުގެ ދައުވަތަކަށް އިދިކޮޅު އެމްޑީޕީގެ ރައީސް އަދި ކުރީގެ ހާރިޖީ ވަޒީރު އަބްދުﷲ ޝާހިދާއި އެމްޑީޕީ ސަރުކާރުގެ ނައިބު ރައީސް ފައިސަލް ނަސީމްވަނީ މިއަދު އެރަށަށް ވަޑައިގެންފައެވެ. މި ދަތުރުގައި ފީއަލީގައި ތިއްބެވި އެ ޕާޓީގެ މެންބަރުންނާ ބައްދަލުކޮށް ކުރިއަށް ހުރި ޕާޓީގެ ހަރަކާތްތަކާ ގުޅޭގޮތުން މަޝްވަރާ ކުރާނެކަމަށް އެޕާޓީންވަނި ބުނެފައެވެ.

Ad by Hajj Corporation

ފީއަލީ ވޮލީ ކޯޓު ހުޅުވުމުގެ މަސައްކަތްތައްވެސް މި ދަތުރުގެ ތެރެއިން ކުރިއަށްގެންގޮސްފައިވާއިރު ކައުންސިލްތަކުގެ ބެލެނިވެރި ފަރާތްކަމުގައިވާ އެލްޖީއޭއިންވަނީ ވޮލީ ކޯޓު ހުޅުވުން މިވަގުތައް މަޑުޖައްސާލަން އަންގާފައެވެ.

ވޮލީ ކޯޓު ހުޅުވުން މިވަގުތައް މަޑުޖައްސާލަން އަންގައި އެލްޖީއޭއިން އެ ކައުންސިލަށް ފޮނުވި އެންގުމުގައިވަނީ ލޯކަލް ކައުންސިލްތަކަކީ ދައުލަތުގެ ފަށަލައަކަށްވެފައި، ދައުލަތުން ކައުންސިލްތަކަށް ދެއްވާ ގްރާންޓާއި، ކައުންސިލްތަކުގެ ބަޖެޓުން ޚަރަދުކޮށްގެން ހިންގާ ތަރައްޤީގެ މަޝްރޫޢުތައް ކުރިއަށް ގެންދިއުމާއި އަދި މިފަދަ މަޝްރޫޢުތައް ނިމުމުން މަޝްރޫޢުތައް އިފްތިތާޙުކުރުން ނުވަތަ ހުޅުވުން ފަދަ ކަންކަން ކުރަންވާނީ ސަރުކާރާއި މަޝްވަރާކޮށް، ސަރުކާރުގެ ސިޔާސަތާ އެއްގޮތްވާ ގޮތުގެ މަތިންކަމަށެވެ.

" އެހެންކަމުން، ތިޔަ ކައުންސިލުން ތަރައްޤީކޮށްފައިވާ ވޮލީކޯޓު ހުޅުވުމުގައިވެސް އިސްވެ ދެންނެވުނު ގޮތުގެ މަތިން ޢަމަލުކުރެއްވުމަށާއި، މިވަގުތު ވޮލީކޯޓު ހުޅުވުމުގެ ކަންކަން މަޑުޖައްސާލުމަށް ދަންނަވަމެވެ. " އެލްޖީއޭގެ ބަޔާނުގައިވެއެވެ.

އަދި މިކަމަކީ ޒުވާނުންނާއި ގުޅުންހުރި މުހިއްމުކަމަކަށްވެފައި، ވީހާވެސް އަވަހަކަށް ވޮލީކޯޓު ހުޅުވާ، ޒުވާނުންނަށް ބޭނުންކުރެވޭނެ ގޮތް ހެދުމަށްޓަކައި ކުޅިވަރާބެހޭ ވުޒާރާގެ މަޝްވަރާގެ މަތިން ވޮލީކޯޓު ހުޅުމުގެ ކަންކަން އިންތިޒާމް ކުރުމަށް އެލްޖީއޭއިންވަނީ އަންގާފައެވެ.

ފަހަކަށް އައިސް އެމްޑީޕީގެ މެޖޯރިޓީ އޮންނަ ކައުންސިލްތަކުން އަންނަނީ އެރަށްރަށުގައި ކުރިއަށްގެންދާ މަޝްރޫއުތައް އިފްތިތާހުކުރުމަށް އެމްޑީޕީގެ އިސްފަރާތްތަކަށް ދައުވަތުދެމުންނެވެ. މީގެ ކުރިން ކުރީގެ ރައީސް އިބްރާހީމް މުހައްމަދު ސާލިހުވެސް ވަނީ ފ.މަގޫދޫ ކައުންސިލުގެ ދައުވަތަކަށް އެ ރަށަށް ވަޑައިގެން އެރަށު ދަތުރުވެރިންގެ ހިޔާ އާއި ލައިސަންސް ޓްރެކް ރަސްމީކޮށް ހުޅުވާދެއްވާފައެވެ.