މިޑިއާތައް ރެގިއުލޭޓުކުރުމާ ގުޅޭ ބިލަށް ސަރުކާރުގެ ފަރާތުން އިސްލާހުތައް ހުށައަޅާފައިވާނީ މީޑިއާއާއި އަދި އާންމު ރައްޔިތުންގެ ހައްގުތައް ހިމާޔަތްކުރެވޭފަދަ ގޮތަކަށްކަމަށް ބަންޑާރަނައިބު އަޙުމަދު އުޝާމު ވިދާޅުވެއްޖެއެވެ.

އެކްސްގައި މީހަކު ކުރި ޕޯސްޓަކަށް ޖަވާބުދެއްވަމުން ބަންޑާރަނައިބު އުޝާމް ވިދާޅުވީ އަމިއްލަ މެމްބަރަކު މަޖިލީހަށް ހުށަހަޅުއްވާފައިވާ މީޑިއާ ބިލުގައި މައްސަލަތައް ހުރިކަމަށް ގަބޫލުފުޅު ކުރައްވާ ކަމަށެވެ. އެހެންކަމުން މިބިލު ދިރާސާކުރެއްވުމަށްފަހު ސަރުކާރުގެ ފަރާތުން މިބިލަށް އިސްލާހުތަކެއް ހުށައަޅުއްވާފައިވާކަމަށެވެ.

Ad by Hajj Corporation

ބަންޑާރަނައިބު ވިދާޅުވީ ކޮމިޓީ މަރުހަލާގައި ކަމާއިގުޅުންހުރި ފަރާތްތަކުގެ ޚިޔާލާއި މަޝްވަރާ ބޭނުންވާނެކަމަށެވެ. ބަންޑާރަނައިބު ވިދާޅުވީ ބިލުގައި މާނަ ދޭހަނުވާގޮތަށް ހުރި ކަންކަން މާނަ ދޭހަވާގޮތަށް، ސަރުކާރުގެ ފަރާތުން ހުށައަޅާފައިވާ އިސްލާހުތަކުގައި ތިލަކޮށްދީފައިވާނެ ކަމަށެވެ. އޭގެ މިސާލެއްގެ ގޮތުގައި ބަންޑާރަނައިބު ދެއްވީ އިލެކްޓްރޯނިކް މީޑިއާގެ މާނަކުރުން އިތުރަށް ތަފްސީލްކޮށް ހިމެނުއްވުމެވެ.

ސަރުކާރުގެ އަމާޒަކީ ހުށައަޅާ އިސްލާހުތަކާއިއެކު މީޑިއާއާއި އަދި އާންމު ރައްޔިތުންނަށްވެސް އެންމެ އެކަށީގެންވާ ގޮތަށް އެންމެންގެ ހައްގުތައް ހިމާޔަތްކުރެވޭނެގޮތަށް ބިލު ބައްޓަންކުރުން ކަމަށް ވިދާޅުވިއެވެ.

ބަންޑާރަނައިބު ވިދާޅުވީ ސަރުކާރުގެ މަގުސަދަކަށްވަނީ ގާނޫނު އަސާސީއާއި ގާނޫނީ ތަރަހައިގެތެރެއިން ނޫސްވެރިކަންކޮށް މައުލޫމާތު ފޯރުކޮށްދިނުންކަމަށެވެ. މި އިސްލާހުތަކާ އެއްގޮތަށް ފާސްވެއްޖެނަމަ، ނޫސްވެރިންގެ ހުރިހާ ޝަކުވާތަކަށް ހައްލު ލިބި، ނޫސްވެރިކަން ރެގިއުލޭޓްކުރެވޭނެ ހަރުދަނާ ނިޒާމެއް ގާއިމުކުރެވޭނެކަމަށް ބަންޑާރަނައިބު އުޝާމް ވިދާޅުވިއެވެ. މިޑިއާތައް ރެގިއުލޭޓުކުރުމާ ގުޅޭ ބިލަށް ސަރުކާރުން އިސްލާހު ހުށައަޅާފަވާއިރު، މިހާރު އެ ބިލު އޮތީ ކޮމިޓީ މަރުހަލާގައެވެ.

ރައްޔިތުންގެ މަޖިލީހަށް މި ބިލު ހުށަހެޅުއްވީ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރެވެ. މިއީ ހަންނާން މިފަދަ ބިލެއް މަޖިލީހަށް ހުށަހެޅުއްވި ދެވަނަ ފަހަރެވެ.