ބަންޑާރަނައިބުގެ އޮފީހުން އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ބޭނުންކޮށްގެން ގާނޫނީ މައުލޫމާތު ފޯރުކޮށްދޭ އައު ވެބްސައިޓެއް ތައާރަފުކޮށްފިއެވެ.

އެ އޮފީހަށް 75 އަހަރު ފުރުން ފާހަގަކުރުމަށްޓަކައި ބޭއްވި ރަސްމިއްޔާތުގައި އެ ވެބަސައިޓް ތައާރަފްކޮށްދެއްވީ ރާއްޖޭގެ ރައީސުލްޖުމްހޫރިއްޔާ، ޑރ. މުޙައްމަދު މުއިއްޒުއެވެ.

Ad by Hajj Corporation

ބަންޑާރަނައިބުގެ އޮފީހުން ބުނެފައިވާ ގޮތުގައި، މި އައު ވެބްސައިޓުގެ އެންމެ ހާއްސާ ސިފައަކީ ގާނޫނީ މައުލޫމާތު ފޯރުކޮށްދިނުމަށް ތަޢާރަފުކޮށްފައިވާ އާޓިފިޝަލް އިންޓެލިޖެންސް ފީޗަރއެވެ. މި ފީޗަރގެ އެހީގައި ދިވެހިރާއްޖޭގައި އަމަލުކުރެވޭ ގާނޫނުތަކުގައިވާ މުހިންމު މައުލޫމާތުތައް ވަގުތުން ހޯދުމުގެ ފުރުސަތު ރައްޔިތުންނަށް ލިބިގެންދާނެކަމަށް އެ އޮފީހުން ބުންޏެވެ.

އެ އޮފީހުން ފާހަގަކުރާ ގޮތުގައި، މި ވެބްސައިޓުގައި ހިމެނޭ އޭއައި ޗެޓް ފީޗަރއަކީ އަދިވެސް ތަރައްގީވަމުންދާ އަދި ކަންކަން ދަސްކުރަމުންދާ ފީޗަރއެކެވެ. އެހެންކަމުން، މުސްތަގުބަލުގައި އިތުރު މައުލޫމާތާއެކު ގާނޫނީ ސުވާލުތަކަށް ތަފްސީލީ އަދި ފުރިހަމަ ޖަވާބު ލިބޭނެ ކަމަށް އެ އޮފީހުން އުންމީދުކުރާކަމަށް އެ އޮފީހުން ބުންޏެވެ.

ބަންޑާރަނައިބުގެ އޮފީހުގެ އައު ވެބްސައިޓަކީ ހުރިހާ ގޮތަކުންވެސް ލުއިފަސޭހަ، އަވަސް އަދި ފަސޭހައިން މައުލޫމާތާއި ހިދުމަތްތައް ފޯރުކޮށްދެވޭނެ ވެބްސައިޓަކަށް ހެދުމަކީ އެ އޮފީހުގެ އަމާޒެއް ކަމުގައި ވެސް ފާހަގަކޮށްފައިވެއެވެ.