ޖިނާއީ ބޮޑެތި މައްސަލަތަކުގައި ތުހުމަތުކުރެވޭ މީހުންގެ ތެރެއިން ޤާނޫނީ ވަކީލެއްގެ އެހީތެރިކަން ހޯދޭ ފަދަ މާލީ ތަނަވަސްކަމެއް ނެތް 22 ފަރާތަކަށް، ބަންޑާރަނައިބުގެ އޮފީހުގެ ފަރާތުން ނިމިދިޔަ ޖޫން މަހުގެ ތެރޭގައި، ޤާނޫނީ ވަކީލެއްގެ އެހީތެރިކަން ފޯރުކޮށްދީފައިވާކަމަށް އެ އޮފީހުން ބުނެފިއެވެ.

ބަންޑާރަނައިބުގެ އޮފީހުން ކުރަމުން ގެންދާ މަސައްކަތްތައް ހާމަކަން ބޮޑު ގޮތެއްގައި ރައްޔިތުންނާ ޙިއްޞާކުރުމުގެ ގޮތުން، ކޮންމެ ހަފްތާއަކުވެސް ބަންޑާރަނައިބުގެ އޮފީހުގެ މަސައްކަތްތަކުގެ އަދާހަމަ ޢަދަދުތައް، މިދިޔަ އެޕްރީލް މަހުން ފެށިގެން ބަންޑާރަނައިބުގެ އޮފީހުގެ މީސްމީޑިއާ އެކައުންޓުތައް މެދުވެރިކޮށް ދަނީ ހާމަކުރަމުންނެވެ

މިގޮތުން އެ އޮފީހުން އާއްމުކުރި ބަންޑާރަނައިބުގެ އޮފީހުގެ ލީގަލް އެއިޑްގެ މަސައްކަތްތަކަށް ބަލާއިރު ޖިނާއީ ބޮޑެތި މައްސަލަތަކުގައި ތުހުމަތުކުރެވޭ މީހުންގެ ތެރެއިން ޤާނޫނީ ވަކީލެއްގެ އެހީތެރިކަން ހޯދޭ ފަދަ މާލީ ތަނަވަސްކަމެއް ނެތް 22 ފަރާތަކަށް، މި އޮފީހުގެ ފަރާތުން ނިމިދިޔަ ޖޫން މަހުގެ ތެރޭގައި، ޤާނޫނީ ވަކީލެއްގެ އެހީތެރިކަން ފޯރުކޮށްދީފައިވާކަން ފާހަގަކޮށްލެވެއެވެ.

މީގެ އިތުރުން ނިމިދިޔަ ޖޫން މަހުގެ ތެރޭގައި ބަންޑާރަނައިބު އޮފީހުގެ ފަރާތުން ވަނީ 7 މައްސަލައެއް ކޯޓަށް ހުށަހަޅުއްވައި، 147 ކޯޓު އަޑުއެހުމެއްގައި ބައިވެރިވެފައެވެ.

އަދި ބަންޑާރަނައިބުގެ އޮފީހުން ނިމިދިޔަ ޖޫން މަހުގެ ތެރޭގައި ޤާނޫނީ ލަފާ ފޯރުކޮށްދެވުނު ޢަދަދަށް ބަލާއިރު، 82 މައްސަލައަކަށް ޤާނޫނީ ލަފާ ފޯރުކޮށްދެވިފައިވާ ކަމަށް އެ އޮފީހުގެ ތަފާސްހިސާބުތަކުން ދައްކައެވެ.

ސަރުކާރާއި ދައުލަތަށް ޤާނޫނީ ކަންކަމުގައި ބޭނުންވާ ޤާނޫނީ ލަފާ ދިނުމާއި، ސަރުކާރުގެ އޮފީސްތަކުން އެކުލަވާލާ ގަވާއިދުތަކުގެ ދެލިކޮޕީތައް ބަލައި އެ ގަވާއިދުތަކަށް ޢަމަލުކުރަންފެށުމާއިބެހޭ ގޮތުން ޤާނޫނީ ލަފާދިނުމާއި، ރައްޔިތުންގެ މަޖިލީހުން ފާސްކުރައްވާ ބިލުތައް ރައީސުލްޖުމްހޫރިއްޔާ ތަޞްދީޤުކުރެއްވުމުގެ ކުރިން ޤާނޫނީ ލަފާ ދިނުމުގެ އެންމެހައި މަސައްކަތްތަކަކީ ބަންޑާރަނައިބުގެ އޮފީހުގެ ލީގަލް އެފެއާޒް ޑިވިޜަންއިން ކުރަމުން ގެންދާ މަސައްކަތެވެ.