އާއިލާ މީހަކު ދާއިމީ ބައްޔަކަށް ފަރުވާއެއް ހޯދާނަމަ 30 ދުވަހުގެ ހާއްސަ ޗުއްޓީއެއް ލިބޭ ގޮތަށް ސިވިލް ސާވިސްގެ ގަވާއިދު އިސްލާހުކޮށްފި އެވެ.

ސިވިލް ސާވިސްގެ ގަވާއިދަށް އާދިއްތަ ދުވަހު ގެނައި އިސްލާހުގައި ވަނީ، ގަވާއިދުގެ 188 ވަނަ މާއްދާގެ (ހ) ގެ 1 ވަނަ ނަންބަރާއި 2 ވަނަ ނަންބަރުގައި ބަޔާންކޮށްފައިވާ ހާލަތްތަކުން ކުރެ ހާލަތެއް މުވައްޒަފެއްގެ މަންމަ، ބައްޕަ، އަނބިމީހާ، ފިރިމީހާ، ދަރިއަކަށް، އެއްބަނޑުއެއްބަފާ މީހަކަށް، އެއްބަނޑު މީހަކަށް، އެއްބަފާ މީހަކަށް ނުވަތަ ޝަރުއީ ގޮތުން ބަލަންޖެހިފައިވާ މީހަކަށް ދިމާވެއްޖެނަމަ އަސާސީ މުސާރަ ލިބޭ ގޮތަށް އަހަރަކު 30 ދުވަހުގެ ޗުއްޓީއެއް ލިބޭނެ ކަމަށެވެ.

Ad by Hajj Corporation

އެގޮތުން އެފަދަ ޗުއްޓީއެއް ލިބެނީ މުވައްޒަފެއްގެ މަންމައަށް ނުވަތަ ބައްޕަޔަށް ނުވަތަ އަނބި މީހާއަށް ނުވަތަ ފިރިމީހާއަށް ނުވަތަ ދަރިޔަކަށް ނުވަތަ އެއްބަނޑުއެއްބަފާ މީހަކަށް ނުވަތަ އެއްބަފާ މީހަކަށް ނުވަތަ އެއްބަނޑު މީހަކަށް ނުވަތަ ޝަރުޢީގޮތުން ބަލަންޖެހިފައިވާ މީހަކަށް ދިމާވާ ޙާލަތަކާ ގުޅިގެންނެވެ. އަދި އެ ޙާލަތު މި ޤާނޫނުގެ ޙަވާލާ ދީފައިވާ މާއްދާގައި ބަޔާންކޮށްފައިވާ ކަންކަމަށް ފެތެން ޖެހެއެވެ.

ހާއްސަ ސިއްހީ ބޭނުންތަކަށް ދެވޭ ޗުއްޓީގެ ނަމުގައި ދޭ މި ޗުއްޓީ ދިނުމުގައި ބަލި މީހާއަކީ ޓާމިނަލް އިލްނަސް ނުވަތަ ކްރޮނިކް ކޮންޑިޝަނެއް ތަހައްމަލުކުރަމުންދާ މީހެއް ކަމަށާއި ބަލީގެ ބާވަތާއި ބަލީގެ ސަބަބުން ފަރުވާއަށް ހޭދަވާނެ މުއްދަތު ބަޔާންކޮށް ސިއްހީ ވުޒާރާގައި ރަޖިސްޓަރީކޮށްފައިވާ ސިއްހީ މަސައްކަތްތެރިއެއްގެ މެޑިކަލް ސެޓްފިކެޓް ނުވަތަ ސެޓްފިކެޓް ދޫކުރި ގައުމެއްގެ ރަޖިސްޓަރީކޮށްފައިވާ ސިއްހީ މަރުކަޒަކުން ސިއްހީ މަސައްކަތްތެރިއަކު ދޫކޮށްފައިވާ މެޑިކަލް ސެޓްފިކެޓް ހުށަހަޅަންޖެހެ އެވެ.