އިޒުރޭލުން ލުބުނާނަށް ދިން ހަމަލާގައި އެމެރިކާގެ އެއްވެސް ބައިވެރިވުމެއް ނެތްކަމަށް ވައިޓް ހައުސްގެ ޑެޕިއުޓީ ތަރުޖަމާނު ސަބްރީނާ ސިންގް ބުނެފިއެވެ.

މި ހަމަލާ އާއި ގުޅިގެން އެއްވެސް އިންޒާރެއް ވެސް ދީފައިނުވާ ކަމަށް ވެސް ސަބްރީނާ ވަނީ ހާމަކޮށްފައެވެ. އަދި މި ހަމަލާއަށް އެމެރިކާ އިން އެއްވެސް ސިފައެއްގައި އެއްބާރުލުން ދޭން ނިންމާފައިނުވާނެ ކަމަށް ވެސް ސަބްރީނާ ވަނީ ބުނެފައެވެ.

އެއްވެސް ބައިވެރިވުމެއް ނެތުމުން، ހަގީގަތުގައި ވެސް މި ޙަމަލާ ދީފާނެކަން ވެސް ނޭނގޭ ކަމަށާއި އަދިވެސް އިތުރު ތަފްސީލް އަމިއްލައަށް ދެނެގަންނަން މަސައްކަތް ކުރަމުން އަންނަ ކަމަށް ވެސް ސަބްރީނާ ވަނީ ބުނެފައެވެ.

އެމެރިކާގެ ބައިވެރިވުމެއް މިހަަމާލާގައި ނުވާކަމަށް ބުނި ނަމަވެސް ވަރަށް ފަހުން ވެސް އެމެރިކާއިން ވަނީ އިޒުރޭލަށް 8 ބިލިއަން ޑޮލަރުގެ އަސްކަރީ އެހީތެރިކަން ފޯރުކޮށްދީފައެވެ.

އިޒުރޭލުން ވަނީ ލުބުނާނަށް ވައިގެ މަގުން ނުރައްކާތެރި ހަމަލާތައް ދޭން ފަށާފައެވެ. މިހަމަލާތަކުގައި 9 އިމާރާތެއް ވަނީ ބިމާހަމަވެފައެވެ. ޔަހޫދީ ރިޕޯޓުތައް ބުނާ ގޮތުން މިހަމަލާ އަމާޒު ކޮށްފައިވަނީ ހިޒްބުالله ގެ ލީޑަރު ހަސަން ނަސްރުالله އަވަހާރަކޮށްލަން ކަމަށެވެ. ނަމަވެސް މިހަމާލާގައި ހަސަން ނަސްރުﷲ އަށް އެއްވެސް ގެއްލުމެއްނުވާ ކަމަށް ހަޒްބުﷲ ގެ އޮފިޝަލުން ވަނީ ވިދާޅުވެފައެވެ.