އިސްރާއިލުން ސެންޓްރަލް ޣައްޒާގެ ނުސެއިރަތް އަދި މަގާޒީ އަށް ޙަމަލާދީ، ހަތަރު މީހަކު މަރައި އިތުރު ބަޔަކު ޒަޙަމްކޮށްލައިފިއެވެ.

ގަޒާގެ ސިވިލް ޑިފެންސުން ބުނި ގޮތުގައި، އިސްރާއީލުން މިއަދުގެ ހެނދުނުގެ ވަގުތެއްގައި ޣައްޒާގެ ނުސައިރަތް ރެފިއުޖީ ކޭމްޕަށް ދިން ޙަމަލާގައި، ތިން މީހަކު މަރާލައިފައިވާއިރު، އިތުރު މީހަކު ވަނީ މަގާޒީ އިން މަރާފައެވެ.

މީގެ އިތުރުން ވެސް، އިސްރާއީލުން ވަނީ އުތުރު ގާޒާގެ ސަބްރާ އަދި ޒެއިތޮން އަށް ޙަމަލާދީފައެވެ. އެ ޙަމަލާތަކުގައި ބަޔަކަށް އަނިޔާވިކަމެއް ރިޕޯޓުކުރެވިފައެއް ނުވެއެވެ.

އެ މީހުންނަށް ޙަމަލާދީފައިވަނީ ރޮކެޓް ބޭނުންކޮށް، ވައިގެ މަގުންނެވެ.

އިސްރާއީލުން ޣައްޒާއަށް ޙަމަލާތަކެއް ދީފައިވާއިރު، އެ ގައުމުގެ އަސްކަރިއްޔާ އިން ދަނީ ލުބުނާނަށް ވެސް ވަރުގަދަ ޙަމަލާތަކެއް ދީފައެވެ. އެގޮތުން ފާއިތުވި 24 ގަޑިއިރުގެ ތެރޭގައި އިސްރާއީލުން ލުބުނާނުގެ ވެރިރަށް، ބެއިރޫތް އަދި އިރުމަތީ ލުބުނާނުގެ އަވަށެއް ކަމުގައިވާ ބެކާ ވެލީއަށް އަށް އަމާޒުކޮށް ވަރުގަދަ ޙަމަލާތަކެއް އިސްރާއީލުން ދީފައިވާއިރު، މިދިޔަ ހަފުތާއިން ފެށިގެން އިސްރާއީލުން ލުބުނާނަށް ދެމުންދާ ޙަމަލާތަކުގައި 700 އަށް ވުރެ ގިނަ މީހުން ވަނީ މަރުވެފައެވެ.

އަދި ފާއިތުވި ގާތްގަޑަކަށް އަހަރެއްގެ ތެރޭގައި ޣައްޒާއަށް އިސްރާއީލުން ދިން ޙަމަލާތަކުގައި، 41،000 އަށް ވުރެ ގިނަ މީހުން ވަނީ މަރުވެ، ލައްކައެއްހާ މީހުން ވަނީ ޒަޙަމްވެފައެވެ.