އިޓަލީ އާއި އިޒްރޭލް އާ ދެމެދު ކުޅުމަށް ހަމަޖެހިފައިވާ ވޯލްޑް ކަޕް ކޮލިފައިންގ ބޭއްވުމާއި ދެކޮޅަށް، އިޓަލީގެ ފުޓްބޯޅަ ޓީމުގެ ތަމްރީން މަރުކަޒުގެ ގޭޓު ކައިރިއަށް ޖަމާވެ ގިނަ ަބަޔަކު އިހުތިޖާޖުކޮށްފިއެވެ.

މި އިހުތިޖާޖަކީ ޣައްޒާގައި ހިނގަމުންދާ ޤަތުލުއާންމާއި ގުޅިގެން އިޓަލީގެ އެންމެ ބޮޑު ޔޫނިއަނުން ބުނާ ގޮތުގައި ދެ މިލިއަނަށްވުރެ ގިނަ މީހުން ބައިވެރިވި ގައުމީ ހުއްޓުވުމުގެ ތެރެއިން ކުރެވުނު އިހުތިޖާޖެކެވެ. އަދި އިޒްރޭލީ ބާރުތަކުން ހުއްޓުވާލި ފްލޮޓީލާގެ އާއި ދެކޮޅަށް ދިން ހަމަލާތަކާއި ދެކޮޅަށްވެސް މިމުޒާހަރާގައި އަދޫ އުފުލާފައިވެއެވެ.

Ad by Hajj Corporation

އިޓަލީ އާއި އިޒްރޭލް އާ ދެމެދު ކުޅުމަށް ހަމަޖެހިފައިވަނީ އޮކްޓޯބަރު 14 ގައި އިޓަލީގެ އުޑީނޭގައެވެ. ހަނގުރާމައާ ގުޅިގެން އިޒްރޭލް ސަސްޕެންޑް ކުރުމާމެދު ޔޫއެފްއޭ އިން ވަނީ މަޝްވަރާތައް ފަށާފައެވެ. އިހުތިޖާޖު ކުރިއަށްދިޔައިރު ކުޅުންތެރިން ފްލޮރެންސްގައި ހުންނަ ކޮވަރޗިއާނޯ ތަމްރީން މަރުކަޒުގައި ނެތްނަމަވެސް، ހޯމަ ދުވަހު އެތަނަށް ޓީމު އެއްވާން ވަނީ ހަމަޖެހިފައެވެ.

އިޒްރޭލީ ނޭވީން ގްލޯބަލް ސުމޫދު ފްލޮޓިލާ ހުއްޓުވާލައި، އެކްޓިވިސްޓުން ހައްޔަރުކުރުމާ ގުޅިގެން ބުދަ ދުވަހުގެ ރޭއްސުރެ އިޓަލީގެ އެކި ހިސާބުތަކުގައި އިހުތިޖާޖުތައް ފެށިގެން ގޮސްފައިވެއެވެ. ހުކުރު ދުވަހު މަސައްކަތްތެރިންނާއި ދަރިވަރުން މަގުމައްޗަށް ނުކުމެ، ގިނަ އަދަދެއްގެ ޓްރެއިންތަކާއި އެތެރޭގެ ބައެއް ފްލައިޓްތައް ކެންސަލްވެ، އަދި ގިނަ އަދަދެއްގެ ސްކޫލްތައް ބަންދުކުރެވުނެވެ. މިލާނޯގައި އިހުތިޖާޖުކުރި ފަރާތްތަކުން ފުލުހުންނާ ދިމާލަށް ފުޅި އުކާލުމުން، ފުލުހުން ވަނީ ދުންބޯޅައިގެ ޖަވާބުދީފައެވެ.

އިޓަލީ އާއި އިޒްރޭލް އާ ދެމެދު ފާއިތުވި އޮކްޓޯބަރުގައި ނޭޝަންސް ލީގުގެ މެޗެއް އުޑީނޭގައި ކުޅުނެވެ. އެ މެޗުގެ ކުރިންވެސް މީގެކުރިން މުޒާހަރާތައް ވަނީ ކުރިޔަށްގެންގޮސްފައެވެ. މިމެޗުގައި ފަލަޞްތީނަށް ތާއީދުކޮށް އިހުތިޖާޖް ކުރި ނަމަވެސް، ވަރުގަދަ ސެކިއުރިޓީ ބެލެހެއްޓުމުގެ ދަށުން އެ މެޗު ކުރިއަށް ގެންގޮސް، އިޓަލީ ވަނީ 4-1 އިން މެޗު ކާމިޔާބުކޮށްފައެވެ.