ވޯލްޑް ކަޕް ކޮލިފައިންގައި ބޮސްނިއާ-ހެރްޒެގޮވީނާ އަތުން ބަލިވެ، ދުނިޔޭގެ ޗެމްޕިއަންކަން ހަތަރު ފަހަރު ހޯދާފައިވާ އިޓަލީ ޖެހިޖެހިގެން ތިންވަނަ ފަހަރަށް ވޯލްޑް ކަޕަށް ކޮލިފައި ނުވެ މުބާރާތުން ކަޓައިފިއެވެ. މިއީ ވޯލްޑް ކަޕްގެ ތާރީޚުގައި ކުރިން މުބާރާތް ކާމިޔާބުކޮށްފައިވާ ޓީމެއް ޖެހިޖެހިގެން ތިން ފަހަރު މުބާރާތުން ބޭރުވި ފުރަތަމަ ފަހަރެވެ.

ޒެނިކާގައި ކުޅުނު މި ފޯރިގަދަ މެޗުގެ ފުރިހަމަ ވަގުތު ހަމަވީ 1-1 އިން ދެޓީމު އެއްވަރުވެގެންނެވެ. ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި ބޮސްނިއާ އިން ވަނީ 4-1 އިން އިޓަލީ ބަލިކޮށް، އުތުރު އެމެރިކާގައި ބޭއްވުމަށް ހަމަޖެހިފައިވާ ވޯލްޑް ކަޕްގެ ޖާގައެއް ކަށަވަރުކޮށްފައެވެ.

Ad by Hajj Corporation

މެޗުގެ 15 ވަނަ މިނެޓުގައި މޮއިސް ކީން ވަނީ ލަނޑެއް ޖަހައި އިޓަލީއަށް ކުރިހޯދައިދީފައެވެ. ނަމަވެސް ފުރަތަމަ ހާފު ނިމެން ކައިރިވެފައި ވަނިކޮށް، އިޓަލީގެ ޑިފެންޑަރު އެލެސަންދްރޯ ބަސްޓޯނީ ކުރި ފައުލަކާ ގުޅިގެން އޭނާއަށް ސީދާ ރަތް ކާޑެއް ދައްކައި ދަނޑުން ފޮނުވާލުމުން އިޓަލީއަށް މެޗުގެ ބޮޑު ބައި ކުޅެން ޖެހުނީ އެކަކު މަދުކޮށެވެ. ބޮސްނިއާ އިން މެޗުގެ ނަތީޖާ އެއްވަރުކުރީ 79 ވަނަ މިނެޓުގައި ހާރިސް ތަބަކޮވިޗް ޖެހި ލަނޑުންނެވެ.

ޕެނަލްޓީ ޝޫޓްއައުޓްގައި އިޓަލީގެ ފްރެންޗެސްކޯ ޕިއޯ އެސްޕޮސިޓޯ އާއި ބްރަޔަން ކްރިސްޓަންޓޭ އަށް ޕެނަލްޓީ ކާމިޔާބެއް ނުކުރެވުނެވެ. އެސްޕޮސިޓޯ ފޮނުވާލި ޕެނަލްޓީ ގޯލްގެ މަތިން ދިޔައިރު، ކްރިސްޓަންޓޭގެ ހަމަލާ އަމާޒުވީ ގޯލްގެ ހުރަސް ދަނޑިއަށެވެ. ބޮސްނިއާގެ ފަހު ޕެނަލްޓީ ކާމިޔާބުކޮށް އެޓީމަށް މޮޅުކޮށްދިނީ އެސްމިރް ބަޖްރަކްތަރެވިޗް އެވެ.

މި ނާކާމިޔާބީއާއެކު، އިޓަލީން ދެން ވޯލްޑް ކަޕެއްގައި ކުޅުމުގެ ފުރުސަތު ލިބޭއިރު، އެޓީމު އެންމެ ފަހުން ވޯލްޑް ކަޕެއްގައި ކުޅުނުތާ 16 އަހަރު ވާނެއެވެ. އަދި 2006 ވަނަ އަހަރުގެ ފައިނަލުގައި ފްރާންސް ބަލިކުރި ފަހުން، ވޯލްޑް ކަޕްގެ ނޮކައުޓް މެޗެއްގައި އިޓަލީ ކުޅެފައި ނުވާތާ 24 އަހަރު ވެގެންދާނެއެވެ.