ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ އަކީ، ރާއްޖެއަށް ވަޑައިގަތީއްސުރެ ދިވެހި ވެށީގެ ރީތިކަމަށް ހިތް ދޫވެފައިވާ ބޭފުޅެކެވެ. ކޮންމެ ދުވަހަކު ވެސް ދިވެހިރާއްޖޭގެ ބަލާފޫހިނުވާ ގުދުރަތީ މަންޒަރުތަކާއި ވެށީގެ އަސަރުތަކުގެ ތަފާތު ވާހަކަތައް ގެނެސްދެއްވާ ސަފީރު، މިފަހަރު ވަނީ ތަފާތު ތަޖުރިބާއެއްގެ ވާހަކަ ހިއްސާކުރައްވާފައެވެ. ސަފީރުގެ ހިތް މިފަހަރު ދޫވީ ދިވެހި ތާރީޚާއި ސަގާފަތް ރައްކާތެރިކުރާ "ބައިސްކޯފު" ގެ ދާރުލްއާސާރަށެވެ.

ސަފީރު ކޮންގް ޝިއަންހުއާ 'އެކްސް' އަށް ދޫކުރެއްވި ޕޯސްޓެއްގައި ލިޔުއްވި ގޮތުގައި، ބައިސްކޯފުގެ ދާރުލްއާސާރުގައި ކުރެވުނީ ވަރަށް ޝައުގުވެރި އަދި ފައިދާހުރި ތަޖުރިބާއެކެވެ. މިޒިޔާރަތަކީ ދިވެހިރާއްޖޭގެ ތަރިކައަށް އޭނާ ދެއްވާ އަހަންމިއްޔަތު އަންގައިދޭ ކަމެކެވެ.

Ad by Hajj Corporation

"ބައިސްކޯއަފު މިއުޒިއަމްގެ ޒިޔާރަތަކީ ވަރަށް މުހިންމު އަދި ފައިދާހުރި ތަޖުރިބާއެކެވެ. އަޅުގަނޑުމެންގެ ހަނދާންތަކާއި، ތާރީޚާއި އަދި ސަގާފީ ތަރިކަ ދެމެހެއްޓުމަކީ އަޅުގަނޑުމެންގެ ހަމައެކަނި ޒިންމާއެއް ނޫނެވެ. މިކަމުގައި ވަނީ ޒަމާނީ އަގުހުރި ވަސީލަތްތައް އުފެއްދުމުގެ ފުރުޞަތުތަކެއްވެސް މެއެވެ. ޚާއްޞަކޮށް ފަތުރުވެރިކަމުގެ ދާއިރާގައި، ދިވެހިންގެ ތަފާތު ސަގާފަތް ދުނިޔެއަށް ދެއްކުމުގެ ގޮތުން މިކަމުގެ މުހިންމުކަން ފާހަގަކޮށްލެވެއެވެ. ބައިސްކޯއަފަށް ޝުކުރު ދަންނަވަމެވެ. އަދި ތިޔަ ފަރާތުގެ ޝައުޤުވެރި ޓީމާއެކު އިތުރަށް މަސައްކަތްކުރުމަށް އަޅުގަނޑު ވަރަށް ބޮޑަށް އުންމީދުކުރަމެވެ." ސަފީރު ވިދާޅުވެފަވެއެވެ.

މި ޒިޔާރަތުން ދައްކުވައިދެނީ، ދިވެހިރާއްޖެއަށް ޗައިނާ ސަފީރު ދެއްވާ އިހުތިރާމާއި، ހަމައެކަނި ގުދުރަތީ ރީތިކަމަށް ވުރެ ބޮޑަށް، ދިވެހި ސަގާފަތާއި ތާރީޚަށް އޭނާ ދެއްވާ އަހަންމިއްޔަތެވެ. މީގެ ސަބަބުން ދެ ގައުމުގެ ދެމެދުގައިވާ ގުޅުން އިތުރަށް ބަދަހިވެ، ސަގާފީ ދާއިރާއިން ގުޅިގެން މަސައްކަތް ކުރުމުގެ ފުރުސަތުތަކެއް ފަހިވެގެންދާނެ ކަމަށް ބެލެވެއެވެ.