ވަގަށް އެތެރެކުރަނިކޮށް، ކަސްޓަމްސް އިން ހިފަހައްޓައި މޯލްޑިވްސް ޕޯޓްސް ލިމިޓެޑް- އެމްޕީއެލް ހުޅުމާލޭ ބަނދަރުގައި ބަހައްޓާފައިހުރި ސިނގިރެޓްތައް ގެއްލުނު މައްސަލަ ތަހުގީގުކުރަމުން އަންނަކަމަށް އެކުންފުނިން ބުނެފިއެވެ.

އެމްޕީއެލްއިން ބުނީ މި މައްސަލައަކީ ފުލުހުންގެ ތަޙްޤީޤުގެ މަރުޙަލާގައިވާ މައްސަލައަކަށްވުމާއެކު، މިކަމާ ގުޅޭ އިތުރު ތަފްޞީލު މި ވަގުތު ދެވެން ނެތްކަމަށެވެ.

Ad by Hajj Corporation

އަދި، މި މައްސަލައާ ގުޅިގެން އެމް.ޕީ.އެލްގެ ކަމާގުޅުންހުރި ޑިޕާޓްމަންޓުތަކުން އެތެރޭގެ ތަޙްޤީޤެއް ކުރިއަށްގެންދާކަމަށްވެސް އެމްޕީއެލްއިން ބުނެއެވެ.

މި މައްސަލައިގެ ތަހުޤީޤު ނިމުމުން، ތަހުޤީޤު ރިޕޯޓާއި އެއްގޮތަށް އެމް.ޕީ.އެލް އިން އަޅަންޖެހޭ އެންމެހާ ފިޔަވަޅުތައް ތަންފީޒުކުރާނެކަމުގެ ޔަގީންކަންވެސް އެ ކުންފުނިން ވަނީ ދީފައެވެ.

މިއީ 40 ފޫޓުގެ ދެ ކޮންޓެއިނަރެއްގައި ހުރި 1،360 ކޭސް ސިނގިރޭޓެވެ.

މީގެ ކުރިންވެސް ކަސްޓަމްސްއިންވަނީ ގަވާއިދާ ހިލާފަށް ރާއްޖެ އެތެރެކުރަން އުޅުނު ސިނގިރޭޓްތަކެއް އަތުލައިގެންފައެވެ.

ކަސްޓަމްސްގެ މަސައްކަތްތައް ބައްޓަންވެފައި ހުރީ، ދުރާލާ ލިބޭ އިންޓެލިޖެންސް މައުލޫމާތާއި ޓްރޭޑް ޕްރޮފައިލް އަށް ބިނާކޮށް ކަނޑައެޅޭ ހިރާސްގެ މިންވަރުތަކަށް ރިއާޔަޔްކޮށް މުދަލުގެ ލިޔެކިއުން ނިންމުމާއި މުދާ ބަލައި ފާސްކުރުމުގެ މައްޗަށްކަމަށް އެ ކުންފުނިން މައުލޫމާތުދެއެވެ.

އެގޮތުން ދުރާލާ ލިބޭ މައުލޫމާތުތަކަށް ބިނާކޮށް، ޤާނޫނާ ޤަވާއިދާ ޚިލާފު އަމަލުތަކަށް ޝައްކުކުރެވޭ ހާލަތްތަކުގައި، މުދާ ކްލިއާ ކުރުމުގެ ފުރުސަތު ދިނުމަށްފަހު، ޤާނޫނާއި ޤަވާއިދާ ޚިލާފު އަމަލުތައް ހިންގާ ނެޓްވޯކްތައް ހޯދައި، އެފަރާތްތަކަށް ވާޞިލްވުމަށްޓަކައި "ކޮންޓްރޯލްޑް ޑެލިވަރީ" އޮޕަރޭޝަންތައް ކުރިއަށް ގެންދެވޭކަން ކަސްޓަމްސްއިން ވަނީ ފާހަގަކޮށްފައެވެ.