2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދިޔަ ގަތުލުއާއްމު ހުއްޓާލުމަށް ފަހު ރަހީނުން ދޫކުރީ މަޖުބޫރުވެގެންކަމަށާއި އަދިވެސް ފަލަސތީނުގެ ރައްޔިތުން ހައްޔަރުކޮށް ލާއިންސާނީ އަނިޔާތައްދޭނެކަމަށް ޔަހޫދީން ބުނެފިއެވެ.

އެއްބަސްވުމުގެ ދަށުން ހޯމަ ދުވަހު ޔަހޫދީ ޖަލުތަކުން މިނިވަންވި 250އެއްހާ މީހުންނާއި ދެ އަހަރުގެ އުދުވާނުގެ ދުވަސްވަރު ޔަހޫދީންގެ ބެލުމުގެ ދަށަށް ގެންގޮސްފައިވާ ފަލަސްޠީިނުގެ 1،700 މީހުންގެ ތެރެއިން ބަޔަކު އަނބުރާ ފަލަސްތީނުގެ ބިމަށް ނާދެވޭ ގޮތަށް ތޫނިސްއާއި އަލްޖަޒާއިރާއި ތުރުކީވިލާތަށް ފޮނުވާލަން ޔަހޫދީން ވަނީ ނިންމާފައެވެ.

Ad by Hajj Corporation

އިއްޔެ ރަހީނުން ދޫކުރަމުންދިޔަ ދަނޑިވަޅުގައިވެސް ޔަހޫދީ ސިފައިންވަނީ "އަދިވެސް ހައްޔަރުކޮށް ލާއިންސާނީ އަނިޔާތައް ކުރާނެ" ކަމަށް ލިޔެފައިވާ ކަރުދާސްތަކެއް ފަލަސްތީނުގެ ރައްޔިތުންގެ ތެރެއަށް އުކާފައެވެ.

ޔަހޫދީން މިނިވަން ކުރުމަށް އެއްބަސްވެފައިވާ ފަލަސްތީނުގެ ރައްޔިތުންނާމެދު އިހާނާތްތެރި ގޮތްގޮތަށް އަމަލުކުރެވެމުންދާއިރު ޣައްޒާގައި ވެރިކަންކުރާ ޙަމާސްއިން ވަނީ އެ ޖަމާއަތުގެ ބެލުމުގެ ދަށުގައި ތިބި ޔަހޫދީ އަސީރުން އެއްބަސްވުމާ އެއްގޮތަށް މިނިވަންކޮށްފައެވެ. އެމީހުންގެ ހައްގުތައް ކަށަވަރުކޮށްދީ ދޫކޮށްލުމުގެ ކުރިން އެމީހުންގެ އާއިލާތަކާ ގުޅޭނެގޮތްވެސް ހަމާސްއިން ފަހިކޮށްދިނެވެ.

މަޖުބޫރުން ފަލަސްތީނުގެ ރައްޔިތުން އަވަށްޓެރި ގައުމުތަކަށް އަރުވާލުމަކީ އެ ރައްޔިތުންގެ ރައްވެހިކަމުގެ ހައްގުތަކާ ހިލާފުކަމެކެވެ. އަދި މިއީ ޣައްޒާގެ ރައްޔިތުން އެ ބިމުން ބޭރުކުރުމަށް ޔަހޫދީން ގެންގުޅޭ ހީލަތްތެރި ވިސްނުމުގެ ބައެކެވެ.

ފަލަސްތީނުގެ އަސީރުންނާމެދު މިގޮތަށް ކަންކުރުމުގެ ސަބަބުން އާއިލާއާ ވަކިވެ އެމީހުން އަރުވައިލެވޭ ގައުމުތަކުގައި ބީރަށްޓެހިންނަށްވެ އެ މީހުންނަށް ބޮޑެތި ހުރަސްތައް ކުރިމަތިވާނެ އެވެ.

ރަހީނުންގެ ގޮތުގައި ސަލާމަތްވީ މީހުންނަށް ވަނީ އެތައް ދުވަހެއްވަންދެން ނުކާންދީ ބައިތިއްބުމުގެ އިތުރަށް ލާއިންސާނީ އެތައް އަނިޔާތަކެއް ދީފައެވެ. އެ މީހުން ވަނީ ޔަހޫދީ ޖަލުތަކަކީ މީހުން ދިރިތިއްބައި "ކަތިލާ ތަންތަން" ކަމަށް ސިފަކޮށްފައެވެ.