އއ. މަހިބަދޫން މާލެއަށް ދަތުރުކުރަމުންދިޔަ ލޯންޗެއްގެ އިންޖީނު ހުއްޓުމާ ގުޅިގެން މެރިން ޕޮލިހުން އެ އުޅަނދަށް އެހީތެރިކަން ފޯރުކޮށްދޭން ފަށައިފިއެވެ.

މެރިން ޕޮލިހުން މައުލޫމާތު ދިންގޮތުގައި މިއަދު މެންދުރުފަހު 15:49 ގައި އެ ލޯންޗްގެ އިންޖީނު ހުއްޓުނީ ކ. ރަންނާޅިއާއި 14 މޭލު ދުރުގައި އޮއްވައެވެ.

Ad by Hajj Corporation

އިންޖީނު ހުއްޓުނު އިރު އެ ލޯންޗުގައި 6 ފަތުރުވެރިންނާއި އެކު ފަޅުވެރިން ތިބިކަމަށް ފުލުހުން މައުލޫމާތު ދިނެވެ.

މި ހާދިސާއާ ގުޅިގެން މެރިން ޕޮލިހުގެ އުޅަނދެއް ވަނީ އެ ސަރަހައްދަށް ފޮނުވާފައެވެ. އަދި އެ ލޯންޗަށް ބޭނުންވާ އެހީތެރިކަން ފޯރުކޮށްދެމުން އަންނަ ކަމަށް މެރިން ޕޮލިހުން ބުންޏެވެ.

ފުލުހުންގެ ފަރާތުން އިތުރަށް މައުލޫމާތު ދިންގޮތުގައި، އެ ލޯންޗުގައި ތިބި ފަތުރުވެރިންނާއި ފަޅުވެރިންގެ ހާލު ރަނގަޅެވެ. އަދި އެއްވެސް ފަރާތަކަށް ނުރައްކާވާ ފަދަ ކަމެއް ހިނގާފައި ނުވާކަމަށް ވެސް ފުލުހުން ބުންޏެވެ.