ކޮމިޝަނަރ އޮފް ޕޮލިސް އަޙްމަދު މުޙައްމަދު، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙީމް ޙިލްމީއާ ބައްދަލުކުރައްވައިފިއެވެ.

 ރާއްޖޭގެ ގައުމީ ދިފާއީ ބާރުގެ މައި މަރުކަޒުގައި މިއަދު ބޭއްވި މި ބައްދަލުކުރެއްވުމަކީ، ކޮމިޝަނަރ އޮފް ޕޮލިސްގެ މަގާމާ އަޙްމަދު މުޙައްމަދު ހަވާލުވެވަޑައިގަތުމާ ގުޅިގެން ތައާރަފުވުމަށާއި ދެ މުއައްސަސާގެ މެދުގައި ގުޅުން ބަދަހިކުރުމަށް ބޭއްވި ބައްދަލުވުމެކެވެ.

Ad by Hajj Corporation

 މި ބައްދަލުވުމުގައި، ދެ މުއައްސަސާގެ ދެމެދުގައި އޮންނަ ގުޅުން އިތުރަށް ބަދަހިކުރުމަށާއި، ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުން މަޝްވަރާކުރެއްވިއެވެ.

ދިވެހި ފުލުހުންގެ ޚިދުމަތުގެ ކޮމިޝަނަރ އޮފް ޕޮލިސްގެ މަޤާމަށް، އެސިސްޓަންޓް ކޮމިޝަނަރ އޮފް ޕޮލިސްގެ މަޤާމުގައި ހުންނެވި އަޙްމަދު މުޙައްމަދު، އައްޔަންކުރެއްވީ މިމަހުގެ 5 ވަނަ ދުވަހުއެވެ.

ދިވެހި ފުލުހުންގެ ޚިދުމަތުން ހާމަކުރި ގޮތުގައި، އައު ކޮމިޝަނަރާއެކު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށާއި، މުއައްސަސާއަށް އޮތް އިތުބާރު ދެމެހެއްޓުމަށް ކުރެވޭ މަސައްކަތްތަކުގައި މުޅި މުއައްސަސާގެ ފުރިހަމަ އެއްބާރުލުމާއި އެހީތެރިކަން އަޙްމަދު މުޙައްމަދަށް ލިބިގެންދާނެއެވެ.