ހއ. ކެލާގެ ރައްޔިތުންނަށް މިދިޔަ އެމްޑީޕީގެ ސަރުކާރުން ދިނީ ޤުރުއާނާ ބެހޭ މަރުކަޒުގެ ނަން ބޯޑެއްކަމަށް ކެލާ ދާއިރާގެ މަޖިލިސް މެމްބަރު ޢަބުދުﷲ ޝަރީފް މިއަދު ވިދާޅުވެއްޖެއެވެ.

ޝަރީފް މިފަދައިން ވިދާޅުވީ، މިއަދުގެ މަޖިލީހުގެ ޖަލްސާގައި ވަޒީރާއި ސުވާލު ކުރުމުގެ ވަގުތުގައި މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސަޢީދު ކުރެއްވި ސުވާލުގައެވެ.

Ad by Hajj Corporation

މިނިސްޓަރާއި ސުވާލުކުރަށްވަމުން ޝަރީފް ވިދާޅުވީ، އޭނާގެ ދާއިރާގެ އެއް ރަށް ކަމުގައިވާ ކެލާ އަށް މިދިޔަ ސަރުކާރުން ގުރުއާނާ ބެހޭ މަރުކަޒުގެ ނަން ބޯޑެއް ދީފައިވާ ކަމަށެވެ.

''އަޅުގަނޑުގެ ދާއިރާގެ ކެލާގައި މި ހުސްވި 5 އަހަރުގެ ސަރުކާރުން އެބައިން ގުރުއާނާ ބެހޭ މަރުކަޒުގެ ނަން ބޯޑެއް ރައްޔިތުންނަށް ދީފައި، މިއަދާ ހަމައަށް އައިއިރު ވެސް ޤުރްއާން ކުލާހެއް ވެސް ނުފެށޭ'' ޝަރީފް ވިދާޅުވިއެވެ.

އޭނާ ވަނީ އެ މަސައްކަތް މިހާރު ކޮންމެވެސް ވަރަކަށް ހިނގާކަމަށް މައުލޫމާތު ލިބިފައިވާކަމަށް ވިދާޅުވެ، އެ މަސައްކަތް ރަސްމީކޮށް ފެށޭނެ ތާރީޚަކީ ކޮބައިތޯ މިނިސްޓަރަށް ސުވާލު ދަންނަވާފައެވެ.

ޖަވާބުގައި މިނިސްޓަރު ދެއްކެވި ވާހަކާގައި ވިދާޅުވީ، ކީރިތި ޤުރުއާނާ ބެހޭ މަރުކަޒުގެ ގޮފިތައް މުޅި ރާއްޖޭގެ ހުރިހާ ރަށެއްގައި ހުޅުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢިއުލާން ކުރަށްވާފައިވާ ޚާއްޞަ ސިޔާސަތެއްކަން ފާހަގަކުރަށްވާފައެވެ. އެހެންކަމުން މި މަސައްކަތް މިހާރު ފަށައި ވަރަށް ގިނަ ރަށްތަކުގައި ގޮފިތައް ހުޅުވަމުން އަންނަކަމަށް ޝަހީމް ވިދާޅުވިއެވެ.

މި މަސައްކަތުގެ ތެރެއިން މި ދައުރުގައި ރާއްޖޭގެ ކޮންމެ ރަށެއްގައި ވެސް ގުރުއާނާ ބެހޭ މަރުކަޒުގެ ގޮތްޕެއް ހުޅުވޭނެކަމަށް މިނިސްޓަރު ޝަހީމް ވަނީ ވިދާޅުވެފައެވެ.