މިދިޔަ އެމްޑީޕީ ސަރުކާރުގައި ވައްކަންކުރާވާހަކަ ގޮވީ އެމްޑީޕީގެ މަޖިލީހުގެ މެމްބަރުންނާއި، އެ ޕާޓީގެ އާންމު މެމްބަރުންނާއި އެއިރުގެ ރައީސް އިބްރާހީމް މުހައްމަދު ޞާލިހްގެ ޢާއިލީ ބައެއް މީހުންކަމަށާއި، މިއަދު ހެޔޮވެރިކަމެއް ކޮށްދޭށޭ ބުނެ އެމްޑީޕީން މަގުމައްޗަށް ނުކުންނަންޖެހޭ ސަބަބެއްނެތްކަމަށް ކެލާ ދާއިރާގެ މެމްބަރު ޢަބުދުﷲ ޝަރީފް ވިދާޅުވެއްޖެއެވެ.

މެންދުރު ޓީވީން އާދީއްތަ ދުވަހުގެ ރޭ ގެނެސްދިން "މައުޟޫ" ޕްރޮގްރާމުގައި ވާހަކަފުޅު ދައްކަވަމުން ޝަރީފް ވިދާޅުވީ، 19 ވަނަ މަޖިލީހުގައި ހިމެނޭ އެމްޑީޕީގެ މެންބަރުން އޭރު ގޮވަމުން ދިޔައީ ރައީސް އިބްރާހިމް މުހައްމަދު ޞާލިހް ބޮޑެތި ވައްކަންތައް ކޮށްފައިވާ ކަމަށާއި ގައުމަށް ހިޔާނާތްތެރިވެފައިވާ ކަމަށެވެ.

Ad by Hajj Corporation

"ޔޫޓިއުބް ޗެނަލްތަކާއި، ފޭސްބުކާއި ސޯޝަލް މީޑިއާގައި މިއަދު ވެސް އެ މެންބަރުން ދެއްކި ވާހަކަތައް ފެންނަން އެބަހުރި،" ޝަރީފް ވިދާޅުވިއެވެ.

އިތުރަށް ވާހަކަފުޅު ދައްކަވަމުން ޝަރީފް ވިދާޅުވީ، މިއަދު އަލުން އެމްޑީޕީން މަގުމައްޗަށް ނުކުމެ ރައްޔިތުންނަށް އިންސާފު ހޯދައިދިނުމަށް ނުވަތަ ހެޔޮވެރިކަމެއް ކޮށްދިނުމަށް ގޮވާލަން ޖެހޭ އެއްވެސް ސަބަބެއް ނެތް ކަމަށެވެ.

"އެ ބޭފުޅުން ވެރިކަން ކުރިއިރު ވައްކަންކުރުން ހައްދުން ނައްޓައިގެން ދިޔައީ. އެދުވަހު ރައްޔިތުންގެ މަޖިލީހުގެ ރައީސަކީ ވެސް އެމީހުންގެ މީހެއް. ރައްޔިތުންގެ މަޖިލީހުގެ ރައީސްވެސް ދެއްކީ އެވާހަކަ. އެއް އޮޑިއެއްގައި ތިބިމީހުންނާއި، އާއިލީ މީހުން ވެސް ނުކުމެ އެމީހުންނަށް ވެސް ކެތް ނުވެގެން އެމްޑީޕީ ސަރުކާރުން ކުރަމުން ދިޔަ ވައްކަމުގެ ވާހަކަ ދެއްކި،" ޝަރީފް ވިދާޅުވިއެވެ.

ޝަރީފް ވިދާޅުވީ އެމްޑީޕީގެ ވައްކަންތައް ނަންބަރުން ފެންނަން އެބަހުރިކަމަށާއި، ވެރިކަމުން ފައިބައިގެން ދިޔައީ ބޮޑުތަނުން ގައުމު ދަރުވާލާފައި ކަމަށެވެ.