އުލަތުން ފައިސާ ނަގައިގެން ތިބެ، ގައުމުގެ އިގްތިސޯދު ހަލާކުކުރަން ދޮގު ފަތުރައި ގައުމަށް ގެއްލުންދޭ ޕާޓީތަކާމެދު އެއްވެސް ތަފާތުކުރުމެއް ނެތި ފިޔަވަޅު އެޅުމަށް އިލެކްޝަންސް ކޮމިޝަނަށް ރައްޔިތުންގެ މަޖިލީހުގެ ކެލާ ދާއިރާގެ މެމްބަރު ޢަބްދުﷲ ޝަރީފް ގޮވާލައްވައިފިއެވެ.

މެމްބަރު މިފަދައިން ގޮވާލައްވާފައިވަނީ ޔޫއޭއީގެ އީގަލް ހިލްސް ކުންފުންޏާއި ދިވެހި ސަރުކާރު ގުޅިގެން ރަސްމާލޭގައި ތަރައްގީކުރާ 20 ބިލިއަން ޑޮލަރުގެ އިންވެސްޓްމަންޓާ ގުޅުވައިގެން، އިދިކޮޅު ފަރާތްތަކުން އަސްލެއްނެތް ވާހަކަތައް ފަތުރަމުންދާ ދަނޑިވަޅެއްގައެވެ.

Ad by Hajj Corporation

މިކަމާ ގުޅިގެން މެމްބަރު ޢަބްދުﷲ ޝަރީފް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ސިޔާސީ މަސްރަހުން މިވަގުތު ފެންނަނީ ގައުމު އިސްކުރުމުގެ ބަދަލުގައި އިދިކޮޅު ފަރާތްތަކުން އެމީހުންގެ ސިޔާސީ މަސްލަހަތު އިސްކުރާ މަންޒަރު ކަމަށެވެ. އަދި ގައުމުގެ ހާލަތާމެދު ވިސްނާނުލައި، އިގްތިސޯދީ އަދި އިޖްތިމާއީ ފޭރާން ވީދާލުމަށްޓަކައި ސިޔާސީ ޕާޓީގެ ނަމުގައި ރައްޔިތުންގެ ސިކުނޑިތަކާ ކުޅެ، ދޮގު މައުލޫމާތު ފަތުރަމުންދާ ކަމަށް އޭނާ ފާހަގަކުރެއްވިއެވެ.

އިތުރަށް ވާހަކަދައްކަވަމުން މެމްބަރު ވިދާޅުވީ، ސިޔާސީ ޕާޓީތަކުގެ ބެލެނިވެރި ފަރާތުގެ ހައިސިއްޔަތުން އިލެކްޝަންސް ކޮމިޝަނުން މިކަމުގައި ބަސްބުނެ، ގައުމުގެ މަސްލަހަތު އިސްކޮށް ގާނޫނު ތަންފީޒުކުރަން ޖެހޭ ކަމަށެވެ. އަދި ދައުލަތުން ފައިސާ ނަގައިގެން ހިންގާ ސިޔާސީ ޕާޓީތަކުން އިގްތިސޯދު ފުނޑާލަން ހިތުހުރިހާ ވާހަކައެއް ދައްކަން ފުރުސަތު ދީގެން ނުވާނެ ކަމަށާއި، މިފަދަ ކަންކަމުގައި ވަކި ބަޔަކު ތަފާތުކުރުމެއް ނެތި ފިޔަވަޅު އަޅަންޖެހޭ ކަމަށްވެސް އޭނާ ވިދާޅުވިއެވެ.