ނޯވޭގެ ރަސްގެފާނު ހަރާލްޑް ފަސްވަނަ އަވަހާރަވުމާ ގުޅިގެން، އެ ގައުމުގެ ބޮޑުވަޒީރު ޔޯނަސް ގާ ސްޓޭރޭއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، ރަސްގެފާނު އަވަހާރަވި ހަބަރު އެއްސެވީ ފުން ހިތާމައާއެކު ކަމުގައި ވިދާޅުވެ، ދިވެހި ސަރުކާރާއި ރައްޔިތުންގެ ނަމުގައި ނޯވޭގެ ޝާހީ އާއިލާއަށާއި ސަރުކާރަށް އަދި ރައްޔިތުންނަށް އިޚްލާސްތެރި ތައުޒިޔާ ވަނީ އަރިސްކުރައްވާފައެވެ.

Ad by Hajj Corporation

މީގެއިތުރުން، ރަސްގެފާނު ހަރާލްޑަކީ މުޅި އުމުރުފުޅު ނޯވޭގެ ގައުމީ ހިދުމަތުގައި ހޭދަކުރައްވައި، ސާބިތު ލީޑަޝިޕެއްގެ ދަށުން ރައްޔިތުންގެ ލާބައަށް ގިނަގުނަ މަސައްކަތްޕުޅުތަކެއް ކޮށްދެއްވި ބޭފުޅެއްގެ ގޮތުގައި އަބަދުވެސް ހަނދާން އާކުރެވޭނެ ބޭފުޅެއް ކަމަށް ރައީސް ފާހަގަކުރެއްވިއެވެ. އަދި އެމަނިކުފާނު އަވަހާރަވުމަކީ ހަމައެކަނި ނޯވޭއަށް ލިބުނު ފުން ހިތާމައެއް ނޫން ކަމަށާއި، އެމަނިކުފާނުގެ އަގުހުރި ހިދުމަތްތައް ބަލައިގަންނަ އެންމެހާ ފަރާތްތަކަށް ލިބުނު ބޮޑު ހިތާމައެއް ކަމަށްވެސް ރައީސް ވިދާޅުވިއެވެ. ރައީސްގެ މެސެޖު ނިންމަވާލައްވަމުން ވަނީ، މި ހިތާމަވެރި ދަނޑިވަޅުގައި ޝާހީ އާއިލާއަށާއި ނޯވޭގެ ރައްޔިތުންނަށް ކެތްތެރިކަމާއި ހިތްވަރު ދެއްވުމަށް އެދިވަޑައިގެންފައެވެ.

އުމުރުފުޅުން 89 އަހަރުގައި ރަސްގެފާނު ހަރާލްޑް އަވަހާރަވީ އޮސްލޯ ޔުނިވާސިޓީ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިއަދުގެ ވަގުތެއްގައެވެ.