ބާސެލޯނާގެ ޒުވާން ތަރި ލަމީން ޔަމާލް އުމުރުން 18 އަހަރުގައި ދާއިމީކޮށް ހުންނަ ފަދަ އުނަގަނޑުގެ ތަދެއް (Chronic Groin Injury) ގައި ތަދުތައް އިތުރުވެދާނެ ކަމުގެ ބިރު ހީވެފައިވާ ކަމަށް ރިޕޯޓްތަކުން ބުނެފިއެވެ. އެންމެފަހުން ރެއަލް މެޑްރިޑާ ދެކޮޅަށް ކުޅުނު އެލް ކްލާސިކޯ މެޗުގައި ޔަމާލް ތަދުން ހާސްވެފައި ހުރި މަންޒަރު ފެނިފައިވެއެވެ.

މި ސީޒަނުގައި މިހާތަނަށް ޔަމާލް ވަނީ އުނަގަނޑުގެ މައްސަލަތަކާ ހެދި ހުރިހާ މުބާރާތެއްގެ ފަސް މެޗު މި އަނިޔާގެ ސަބަބުން ގެއްލިފައެވެ. ސްޕެއިންގެ ނޫސް 'ސްޕޯޓް' އިން ރިޕޯޓްކުރާ ގޮތުގައި، ޔަމާލްއަށް ދިމާވެފައިވާ މައްސަލައަކީ 'ޕަބަލްޖިއާ' (Pubalgia) އެވެ. މި ބަލީގައި އުނަގަނޑުގެ ސަރަހައްދުގެ މަސްތައް އެއްތަނަކަށް ޖަމާވެ، އުނދަގޫތަކާއި ތަދު އިހުސާސްކުރެވެއެވެ. ބާސެލޯނާގެ އިސްވެރިން ބިރުގަންނަނީ މި ބައްޔަކީ ދާއިމީ ބައްޔަކަށް ވެ، ފަރުވާ ނުކުރެވޭ ހާލަތަކަށް ގޮސްފާނެތީއެވެ.

Ad by Hajj Corporation

ބާސެލޯނާގެ ލެޖެންޑް ލިއޮނަލް މެސީ ވެސް ޒުވާން ކުޅުންތެރިއެއްގެ ގޮތުގައި ހުރިއިރު މިފަދަ މައްސަލަތަކެއް ދިމާވެފައިވެއެވެ. ނަމަވެސް، މިހާރު 38 އަހަރުގެ މެސީއަށް އޭނާގެ ކުޅުމަށް އެއްވެސް އަސަރެއް ނުކޮށް މިކަން މެނޭޖް ކުރެވުނެވެ. މެސީ 2019 ވަނަ އަހަރު ބުއެނޮސް އައިރިސް ރޭޑިއޯ ސްޓޭޝަން ކްލަބް94.7 އަށް ދިން އިންޓަވިއުއެއްގައި ބުނެފައިވަނީ، "ޕަބަލްޖިއާ އަކީ ވަރަށް އުނދަގޫ ކަމެއް. އަހަރެންނަށް މިކަމުގެ ތަދު ވަރަށް ދުވަހު އިހުސާސްކުރެވުނު. މަދު ތަމްރީނުތަކެއް ކުރެވުނީ. އަދި ހުރިހާ މެޗެއް ކުޅުމުގެ ފުރުސަތު ނުލިބުނު. މިއީ އެއް ރެއަކުން ހައްލުކުރެވޭނެ މައްސަލައެއް ނޫން. މިހާރު ރަނގަޅުވެފައިވީ ނަމަވެސް، އަދިވެސް ފަރުވާ ބޭނުންވޭ."

މިފަދަ ހާލަތެއްގައި ހުރެގެން ވެސް ޔަމާލް ވަނީ މި ސީޒަނުގައި މިހާތަނަށް ކުޅުނު މެޗުތަކުގައި މޮޅު ކުޅުންތަކެއް ދައްކާފައެވެ. ލަލީގާގައި ކުޅުނު ހަ މެޗުން ދެ ގޯލު ޖަހައި ފަސް އެސިސްޓް ދީފައިވާއިރު، ޗެމްޕިއަންސް ލީގުގައި އޮލިމްޕިއާކޯސް އަތުން 6-1 ގެ ނަތީޖާއަކުން މޮޅުވި މެޗުގައި ގޯލެއް ޖަހާފައިވެއެވެ. ބާސެލޯނާ އާއި ޔަމާލްގެ މެޑިކަލް ޓީމުން މިހާރު މަސައްކަތް ކުރަމުން ދަނީ މި މައްސަލަ އިތުރަށް ގޯސްވިޔަ ނުދިނުމަށްޓަކައި އެންމެ ރަނގަޅު ފަރުވާގެ އިންތިޒާމުތައް ހަމަޖެއްސުމަށެވެ.