އިސްރާއީލުގެ ރައްޔިތުން، ބިންގަރާސްތަކުން ނުކުމެ ޢާންމު ދިރިއުޅުންތަކަށް ރުޖޫއަވުމަށް އިސްރާއީލުގެ މިލިޓަރީ ރިއާ އެޑްމިރަލް ޑެނިއަލް ހަގާރީ ވިދާޅުވެއްޖެ. ހަގާރީ ވިދާޅުވީ، އިތުރު ނުރައްކާތަކެއް އޮތް ކަމަކަށް ނުފެންނަ ކަމަށާއި، މި ޙަމަލާގެ ބަދަލު ޙަމަލާއެއް ދިނުމަށް ވެސް ތައްޔާރުވަމުންދާ ކަމަށެވެ.

ބޭރުގެ ނޫސްތަކުން ރިޕޯޓުކުރާ ގޮތުގައި، އީރާނުގެ ގިނަ މިސައިލުތަކެއް އިސްރާއީލުގެ ވެރިރަށް ތެލްއަވީވް އަށް ވަނީ އަމާޒުވެފައެވެ. އެއާއެކު މުޅި އިސްރާއީލު، ސައިރަންގެ އަޑުން ގުގުމާފައި ވާއިރު، އިސްރާއީލުގެ އަޔަން ޑޯމް އިން ދަނީ މިސައިލްތައް އިންޓަސެޕްޓް ކުރަމުންނެވެ. އަދި އެ ނޫސްތަކުގެ ވީޑިޔޯތަކުން ފެންނަ ގޮތުން، އިސްރާއީލުގެ ވެރިރަށުގެ އެކި ހިސާބުތަކަށް މިސައިލް ވަނީ އަމާޒުވެފައެވެ. އެ ޙަމަލާގެ ޒިންމާ އީރަނުން ވަނީ ނަގާފައެވެ. އެގޮތުން އީރާނުން ނެރުނު ބަޔާނެއްގައި ބުނި ގޮތުގައި، އިސްރާއިލާ އަމާޒުކޮށް އިރާނުން ވަނީ 300 އެއްހާ މިސައިލް ފޮނުވާފައެވެ.

އީރާނުން އިސްރާއީލަށް މިސައިލް ޙަމަލާ ދޭން ފަށައިފި

އީރާނުން އިސްރާއީލަށް 250އެއްހަ ބެލިސްޓިކް މިސައިލް ފޮނުވާނެ ކަމުގައި ބޭރުގެ ބައެއް ނޫސްތަކުން ރިޕޯޓްކޮށްފައިވޭ.

އީރާނުން ދޭނެ ޙަމަލާ ވަރުގަދަ ވާނެ ކަމުގައި އިސްރާއީލުގެ އަސްކަރިއްޔާގެ ތަރުޖަމާނު، ރިއާ އެޑްމިރަލް ޑެނިއަލް ހަގާރީ ވިދާޅުވެއްޖެ. އަދި އެ ޙަމަލާގައި އިސްރާއީލަށް އަމާޒުކުރެވޭނެ މިސައިލްތައް ވެސް އިތުރުވާނެ ކަމުގައި އޭނާ ވިދާޅުވިއެވެ.

ޓެލްއަވީވްގައި ބަޑީގެ ޙަމަލާތަކެއް ދީ، 10 މީހަކަށް އަނިޔާވެ ތިން މީހަކު މަރުވެފައިވާ ކަމުގައި ރިޕޯޓުތައް ބުނެއެވެ. އެ ޙަމަލާތަކުގައި ބައިވެރިވެފައިވަނީ ކޮން ބައެއް ކަމެއް އަދި ސާފުވެފައެއް ނުވެއެވެ.

އީރާނުގެ އިންޒާރާއެކު، އިސްރާއީލުގެ ރައީސް ދަތުރުކުރައްވާ މަތިންދާ ބޯޓު އެ ގައުމުގެ އެއާޕޯޓަކުން ފުރާފައިވާ ކަމުގެ ރިޕޯޓުތައް ދަނީ ލިބެމުންނެވެ. އެ ބޯޓުގައި އެގައުމުގެ ބޮޑު ވަޒީރު، ނަތެންޔާހޫ ހިމެނިވަޑައިގަންނަވާކަމެއް ސާފުވެފައެއް ނުވެއެވެ. އަދި އެ ބޯޓުގައި ތިއްބެވީ ކޮން އޮފިޝަލުންނެއް ކަމެއް ވެސް ސާފުވެފައެއް ނުވެއެވެ.

އިރާނުން އިސްރާއީލަށް ބެލިސްޓިކް މިސައިލްތަކެއް ދިނުމުގެ އިންޒާރާއެކު، އިސްރާއީލަށް ވާގިވެރިވާ އެމެރިކާއިން ވެސް ވަނީ އިސްރާއީލު ތައްޔާރަށް އޮތުމަށް ގޮވާލާފައެވެ. އަދި އެކަމުގެ ތެރެއިން އިސްރާއީލުގެ ހަރުކަށި ބޮޑު ވަޒީރު، ބެންޖަމިން ނަތެންޔާހޫ ވެސް ވަނީ ކުރިއަށް އޮތީ ތަދު ދުވަސްތަކެއް ކަމުގައި ބުނެފައެވެ.